പ്രഭാസിന്റെ “സാഹോ”യ്ക്കായി കാത്തിരിക്കുകയാണ് ആരാധകര്‍. ചിത്രത്തിലെ പ്രധാന കഥാപാത്രങ്ങളായ ലാലിന്റെയും ചങ്കി പാണ്ഡ്യയുടെയും ക്യാരക്ടര്‍ പോസ്റ്ററുകള്‍ പുറത്ത് വന്നതിന് പിന്നാലെ ബോളിവുഡ് താരം ജാക്കി ഷെറോഫിന്റെയും ക്യാരക്ടര്‍ പോസ്റ്റര്‍ പുറത്ത് വന്നിരിക്കുകയാണ്.
ചിത്രത്തില്‍ റോയ് എന്ന പ്രധാന കഥാപാത്രമായാണ് ജാക്കി ഷെറോഫ് എത്തുന്നത്. പോസ്റ്ററില്‍ പ്രകടമായ സോള്‍ട്ട് ആന്റ് പെപ്പര്‍ ലുക്കും ചുഴിഞ്ഞിറങ്ങുന്ന നിഗൂഢതയേറിയ കണ്ണുകളും ക്യാരക്ടറിന് ഒരു ഡ്രമാറ്റിക് ലുക്ക് കൊടുക്കുന്നുണ്ട്. “ശരി എന്ന് പറയൂ അല്ലെങ്കില്‍ മരിക്കാന്‍ തയ്യാറാകൂ” എന്നാണ് പോസ്റ്ററിന് ക്യാപ്ഷനായി നല്‍കിയിരിക്കുന്നത്.
300 കോടി രൂപാ ബജറ്റില്‍ ഒരുക്കുന്ന സാഹോ ആഗസ്റ്റ് 30ന് റിലീസ് ചെയ്യും. ചിത്രത്തിന്റെ ട്രെയിലര്‍ നാളെ റിലീസ് ചെയ്യും. സംവിധാനം ചെയ്യുന്നത് സുജിത് റെഡ്ഡിയാണ്. ശ്രദ്ധ കപൂര്‍ നായികയായി എത്തുന്ന ചിത്രത്തില്‍ മലയാള നടന്‍ ലാല്‍ നീല്‍ നിതിന്‍ മുകേഷ്, അരുണ്‍ വിജയ്, മന്ദിര ബേദി, ആദിത്യ ശ്രീവാസ്തവ എന്നിവരാണ് മറ്റ് പ്രധാന താരങ്ങള്‍.