ഛായാഗ്രാഹകന്‍ ഓട്ടാമ്പിള്ളില്‍ സുധീഷ് (പപ്പു) അന്തരിച്ചു. 44 വയസ്സായിരുന്നു. വളരെക്കാലമായി രോഗ ബാധിതനായി ചികിത്സയിലായിരുന്നു അദ്ദേഹം. ഞാന്‍ സ്റ്റീവ് ലോപ്പസ്, സെക്കന്‍ഡ് ഷോ, കൂതറ, അയാള്‍ ശശി, അപ്പന്‍, ഈട, റോസ് ഗിറ്റാറിനാല്‍ തുടങ്ങിയ ചിത്രങ്ങള്‍ക്കാണ് സുധീഷ് ഛായാഗ്രാഹണം നിര്‍വ്വഹിച്ചത്.
സംസ്‌കാരം ഇന്നു രാത്രി 12 മണിക്ക് വീട്ടുവളപ്പില്‍ നടക്കും. മജു സംവിധാനം ചെയ്ത അപ്പന്‍ എന്ന സിനിമയിലാണ് പപ്പു അവസാനം പ്രവര്‍ത്തിച്ചത്. ഷൂട്ട് തുടങ്ങി ഒരാഴ്ചയ്ക്കു ശേഷം അനാരോഗ്യത്തെ തുടര്‍ന്ന് പപ്പു ചിത്രത്തില്‍ നിന്നും പിന്മാറുകയായിരുന്നു.
തുടര്‍ന്ന് വിനോദ് ഇല്ലംപള്ളിയാണ് സിനിമയുടെ ഛായാഗ്രഹണം പൂര്‍ത്തിയാക്കിയത്. രാജീവ് രവിയുടെ പ്രധാന ക്യാമറ സഹായിയായിരുന്ന പപ്പു അന്നയും റസൂലും, കമ്മട്ടിപ്പാടം സിനിമയുടെ സെക്കന്‍ഡ് യൂണിറ്റ് ക്യാമറാമാനായും പ്രവര്‍ത്തിച്ചിട്ടുണ്ട്.