പ്രമുഖ ഛായാഗ്രാഹകനും സംവിധായകനുമായ വേണുവിന് ഗുണ്ടാഭീഷണി. ഫോണിലൂടെയാണ് ഭീഷണി സന്ദേശം എത്തിയത്. ഉടന്‍ തൃശൂര്‍ വിട്ടുപോകണം എന്നാണ് ഭീഷണി. സംഭവത്തില്‍ വേണു പൊലീസില്‍ പരാതി നല്‍കി.
സിനിമയുടെ ഷൂട്ടിംഗുമായി ബന്ധപ്പെട്ട് തൃശൂരിലാണ് വേണു ഇപ്പോള്‍. ഷൂട്ടിംഗ് ലൊക്കേഷനില്‍ നിന്ന് തിരിച്ചെത്തിയ വേണുവിനെ ഹോട്ടലിലെ ഫോണില്‍ വിളിച്ചാണ് ഭീഷണി മുഴക്കിയത്. ഉടന്‍ തൃശൂര്‍ വിട്ടുപോകണം ഇല്ലെങ്കില്‍ വിവരം അറിയും എന്നായിരുന്നു ഭീഷണി.
പിന്നാലെ ഈസ്റ്റ് പൊലീസ് സ്റ്റേഷനില്‍ എത്തി പരാതി നല്‍കുകയായിരുന്നു. ഭീഷണിപ്പെടുത്തിയ സമയത്ത് ഹോട്ടലിലേക്ക് വന്ന ഫോണ്‍ കോളുകളുടെ നമ്പറുകള്‍ പൊലീസിന് കൈമാറി.
അതേസമയം, ജോജു ജോര്‍ജ് ചിത്രം ‘പുലിമട’ ആയിരുന്നു വേണുവിന്റെതായി ഒടുവില്‍ പുറത്തിറങ്ങിയ ചിത്രം. ജോജു ആദ്യമായി സംവിധാനം ചെയ്യുന്ന ‘പണി’യുടെ തിരക്കിലാണ് വേണു ഇപ്പോള്‍.