ഇന്‍വെസ്റ്റിഗേഷന്‍ ത്രില്ലര്‍ ചിത്രവുമായി പൃഥ്വിരാജ്. ഛായാഗ്രാഹകനും പരസ്യചിത്ര സംവിധായകനുമായ തനു ബാലക് ആദ്യമായി സംവിധാനം ചെയ്യുന്ന “കോള്‍ഡ് കേസ്” എന്ന ചിത്രത്തിന്റെ ഷൂട്ടിംഗ് ആരംഭിച്ചു. കോവിഡ് മാനദണ്ഡങ്ങള്‍ പാലിച്ച് തിരുവനന്തപുരത്താണ് ചിത്രീകരണം ആരംഭിച്ചിരിക്കുന്നത്.
അരുവി എന്ന സിനിമയിലൂടെ ശ്രദ്ധേയായ താരം അതിഥി ബാലനാണ് നായിക. ആന്റോ ജോസഫ് ഫിലിം കമ്പനിയുടെയും പ്ലാന്‍ ജെ സ്റ്റുഡിയോസിന്റെയും ബാനറുകളില്‍ ആന്റോ ജോസഫ്, ജോമോന്‍ ടി ജോണ്‍, ഷമീര്‍ മുഹമ്മദ് എന്നിവര്‍ ചേര്‍ന്നാണ് നിര്‍മ്മാണം.
ശ്രീനാഥ് വി നാഥിന്റെതാണ് തിരക്കഥ. ഗിരീഷ് ഗംഗാധരനും ജോമോന്‍ ടി ജോണും ആണ് ഛായാഗ്രഹണം. സംഗീതം പ്രശാന്ത് അലക്‌സ്. പ്രൊഡക്ഷന്‍ കണ്‍ട്രോളര്‍ ബാദുഷ. കലാസംവിധാനം അജയന്‍ ചാലിശ്ശേരി. അതേസമയം, കോവിഡ് മുക്തനായ പൃഥ്വിരാജ് അടുത്ത ആഴ്ച ചിത്രത്തിന്റെ ലൊക്കേഷനില്‍ ജോയിന്‍ ചെയ്യും.
നിവിന്‍ പോളി നായകനാകുന്ന പടവെട്ട് ആണ് അതിഥിയുടെതായി ഒരുങ്ങുന്ന മറ്റൊരു ചിത്രം. ജനഗണമന എന്ന ചിത്രത്തിലായിരുന്നു പൃഥ്വിരാജ് അഭിനയിച്ചു കൊണ്ടിരുന്നത്. സിനിമയുടെ അവസാന ഷെഡ്യൂള്‍ പൂര്‍ത്തിയായപ്പോഴാണ് താരത്തിന് കോവിഡ് സ്ഥിരീകരിച്ചത്.