ലുക്മാന്‍, ശ്രീനാഥ് ഭാസി എന്നിവര്‍ കേന്ദ്ര കഥാപാത്രങ്ങളായ ‘കൊറോണ ധവാന്‍’ ഒ.ടി.ടിയില്‍ എത്തുന്നു. സൈന പ്ലേ ഒ.ടി.ടി പ്ലാറ്റ്‌ഫോമിലാണ് ചിത്രം സ്ട്രീമിംഗ് ആരംഭിക്കുന്നത്. ഒക്ടോബര്‍ 20ന് സൈന പ്ലേയില്‍ സ്ട്രീമിംഗ് ആരംഭിക്കുമെന്നാണ് വിവരം. എന്നാല്‍ ഇത് ഔദ്യോഗികമായി സ്ഥിരീകരിച്ചിട്ടില്ല.
ഓഗസ്റ്റ് 4ന് ആയിരുന്നു ചിത്രം തിയേറ്ററില്‍ എത്തിയത്. കൊറോണക്കാലത്തെ ചിരിമുഹൂര്‍ത്തങ്ങള്‍ ശ്രദ്ധ നേടിയെങ്കിലും ചിത്രത്തിന് ആദ്യ ദിനം തന്നെ നെഗറ്റീവ് റിവ്യൂസ് ആണ് എത്തിയത്. പ്രേക്ഷകര്‍ സ്വീകരിക്കാതയതോടെ ചിത്രം ബോക്‌സ് ഓഫീസില്‍ തളരുകയായിരുന്നു. ചിത്രം റിലീസ് ചെയ്ത് രണ്ട് മാസത്തിന് ശേഷമാണ് ഇപ്പോള്‍ ഒ.ടി.ടിയില്‍ എത്താന്‍ ഒരുങ്ങുന്നത്.
സി സി നിതിന്‍ സംവിധാനം ചെയ്ത ചിത്രത്തില്‍ ജോണി ആന്റണി, ഇര്‍ഷാദ്, ധര്‍മജന്‍ ബോള്‍ഗാട്ടി, സുനില്‍ സുഖദ, ശരത് സഭ, ബാലാജി ശര്‍മ, ഉണ്ണി നായര്‍, സിനോജ് വര്‍ഗീസ്, വിനീത് ട്ടില്‍, ഹരീഷ് പെങ്ങന്‍, ശ്രുതി ജയന്‍ എന്നിവരാണ് ചിത്രത്തില്‍ പ്രധാന വേഷത്തില്‍ എത്തിയ മറ്റ് അഭിനേതാക്കള്‍.
സുജൈ മോഹന്‍രാജ് ആയിരുന്നു തിരക്കഥ ഒരുക്കിയത്. ജനീഷ് ജയനന്ദന്‍ ഛായാഗ്രാഹണം നിര്‍വഹിച്ച ചിത്രത്തിന് സംഗീതം ഒരുക്കിയത് റിജോ ജോസഫ് ആയിരുന്നു. ‘കൊറോണ ജവാന്‍’, എന്നായിരുന്നു സിനിമയുടെ ആദ്യത്തെ പേര്. പിന്നീട് സെന്‍സര്‍ ബോര്‍ഡ് നിര്‍ദേശ പ്രകാരമാണ് ‘കൊറോണ ധവാന്‍’ എന്നാക്കി മാറ്റിയത്.