പ്രഖ്യാപിച്ച സമയം ഏറെ ഹൈപ്പ് നേടി പിന്നീട് ടീസര്‍ എത്തിയപ്പോള്‍ ഏറെ വിമര്‍ശനങ്ങള്‍ കേട്ട സിനിമയാണ് ‘ആദിപുരുഷ്’. പ്രഭാസ് നായകനാകുന്ന ചിത്രത്തിന്റെ ടീസര്‍ എത്തിയപ്പോള്‍ കാര്‍ട്ടൂണ്‍ നെറ്റ്‌വര്‍ക്കിലെ ആനിമേഷന്‍ വീഡിയോ പോലുണ്ട് എന്ന ട്രോളുകളായിരുന്നു വന്നത്. വിമര്‍ശനങ്ങളോട് സംവിധായകന്‍ ഓം റൗട്ട് പ്രതികരിക്കുകയും ചെയ്തിരുന്നു.
ചിത്രത്തിന്റെ പുതിയ പോസ്റ്റര്‍ ആണിപ്പോള്‍ ചര്‍ച്ചകളില്‍ നിറയുന്നത്. രാമ-ലക്ഷ്മണനെയും സീതയെയും വണങ്ങുന്ന ഹനുമാന്റെ ചിത്രമുള്ള പോസ്റ്റര്‍ ആണ് രാമനവമി ദിവസമായ ഇന്ന് ഓം റൗട്ട് പങ്കുവച്ചിരിക്കുന്നത്. ചിത്രത്തില്‍ രാമനായി പ്രഭാസ് എത്തുമ്പോള്‍ ലക്ഷ്മണനായി സണ്ണി സിംഗ് ആണ് വേഷമിടുന്നത്.
സീതയായി കൃതി സനോനും ഹനുമാനായി ദേവദത്ത നാഗെയും വേഷമിടുന്നു. രാവണനായി വേഷമിടുന്നത് സെയ്ഫ് അലിഖാന്‍ ആണ്. എന്നാല്‍ ഇപ്പോള്‍ പുറത്തു വിട്ടിരിക്കുന്ന പോസ്റ്ററിന് എതിരെയും വിമര്‍ശനങ്ങളാണ് ലഭിച്ചു കൊണ്ടിരിക്കുന്നത്.
‘പ്രഭാസ് അണ്ണാ ഈ പ്രോജക്ട് ഉപേക്ഷിക്കുന്നതാണ് നല്ലത്’ എന്നാണ് സോഷ്യല്‍ മീഡിയയില്‍ എത്തിയ ഒരു കമന്റ്. ‘നീണ്ട മുടിയുള്ള ഈ ലുക്ക് അല്ല, പ്രഭാസിന്റെ ബാഹുബലി ലുക്ക് ശ്രീരാമാനായി സങ്കല്‍പ്പിച്ച് നോക്കൂ, അത് ഗംഭീരമാകും’, ‘പോസ്റ്റര്‍ ഒട്ടും പ്രതീക്ഷ നല്‍കുന്നതല്ല’, ‘ഞങ്ങളുടെ വിശ്വസത്തെ തകര്‍ക്കാന്‍ ശ്രമിക്കുന്നത് അനുവദിക്കില്ല, സിനിമ ബാന്‍ ചെയ്യണം’ എന്നിങ്ങനെയാണ് പോസ്റ്ററിന് ലഭിക്കുന്ന ചില കമന്റുകള്‍.
അതേസമയം, ജൂണ്‍ 16ന് ആണ് ചിത്രം തിയേറ്ററില്‍ എത്തുക. ത്രീഡിയിലാണ് ചിത്രം റിലീസിന് ഒരുങ്ങുന്നത്. ടി സീരിയസ്, റെട്രോഫൈല്‍ ബാനറില്‍ ഭൂഷണ്‍ കുമാറും കൃഷ്ണകുമാറും ഓം റൗട്ടും ചേര്‍ന്നാണ് ചിത്രം നിര്‍മ്മിക്കുന്നത്.