തനിക്ക് ലിസ്റ്റിന്‍ സ്റ്റീഫനെ പോലെയാകണമെന്ന് നടന്‍ ധ്യാന്‍ ശ്രീനിവാസന്. . തനിക്കൊരിക്കലും വലിയ നടനാകാന്‍ ആഗ്രഹമില്ലെന്നും വളര്‍ന്ന് വലുതായി നിര്‍മ്മാതാവ് ലിസ്റ്റിന്‍ സ്റ്റീഫന്‍ ആയാല്‍ മതി എന്നുമാണ് ധ്യാന്‍ പറഞ്ഞത്. ധ്യാന്‍ സംസാരിക്കുന്നതിന് തൊട്ട് മുന്‍പ് സ്റ്റേജില്‍ സംസാരിച്ച ലിസ്റ്റിന്‍, ധ്യാന്‍ ഒരു മിനിമം ഗാരന്റി ഉള്ള നടന്‍ ആണെന്ന് പറഞ്ഞിരുന്നു.
കഴിഞ്ഞ ദിവസം അച്ഛന്‍ എന്നോട് ചോദിച്ചു, വലുതാകുമ്പോള്‍ നിനക്കാരാകണം എന്ന്.. ഞാന്‍ പറഞ്ഞു എനിക്ക് വലിയ നടന്‍ ഒന്നും ആകണ്ട. ലിസ്റ്റിന്‍ സ്റ്റീഫന്‍ ആയാല്‍ മതി എന്ന്. ഞാന്‍ സിനിമയില്‍ ‘അളിയാ’ എന്ന് വിളിക്കുന്ന ചുരുക്കം ചില ആളുകളില്‍ ഒരാള്‍ ആണ് ലിസ്റ്റിന്‍.
പക്ഷെ എപ്പോഴും ഞാന്‍ ലിസ്റ്റിനെ ഫോണില്‍ വിളിക്കാറില്ല, വല്ലപ്പോഴുമേ ഉള്ളൂ. അദ്ദേഹത്തിന് തിരക്കാണ് പണം എണ്ണി തീരേണ്ടതുണ്ട്. എനിക്ക് എന്നെങ്കിലും ആരെങ്കിലും ആയി തീരണമെങ്കില്‍ അത് ലിസ്റ്റിന്‍ സ്റ്റീഫന്‍ ആണ്,’ ധ്യാന്‍ ശ്രീനിവാസന് പറഞ്ഞു.
സാഗര്‍ ഹരി ഒരുക്കുന്ന ചിത്രമാണ് ‘വീകം’. ഫാമിലി ത്രില്ലര്‍ ഴോണറില്‍ കഥ പറയുന്ന ചിത്രം ഡിസംബര്‍ 9 ന് തിയേറ്ററുകളില്‍ എത്തും. ധ്യാന്‍ ശ്രീനിവാസന് പുറമെ ഷീലു എബ്രഹാം, അജു വര്‍ഗീസ്, ദിനേശ് പ്രഭാകര്‍, ജഗദീഷ്, ഡെയിന്‍ ഡേവിസ്, ഡയാന ഹമീദ്, മുത്തുമണി എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. അബാം മൂവീസിന്റെ ബാനറില്‍ ഷീലു എബ്രഹാം, എബ്രഹാം മാത്യൂ എന്നിവര്‍ ചേര്‍ന്നാണ് നിര്‍മ്മാണം.