വിനീത് ശ്രീനിവാസനും കുമ്പളങ്ങി നൈറ്റ്‌സ് ഫെയിം മാത്യുവും പ്രധാന വേഷത്തിലെത്തുന്ന തണ്ണീര്‍മത്തന്‍ ദിനങ്ങള്‍ റിലീസിന് തയ്യാറെടുക്കുകയാണ്. സ്‌കൂള്‍ കാലത്തിന്റെ ഓര്‍മകളിലേക്കും പ്രണയങ്ങളിലേക്കും പ്രേക്ഷകനെ കൊണ്ടു പോകുന്ന ചിത്രം അള്ളു രാമേന്ദ്രന്‍ എന്ന ചിത്രത്തിന്റെ തിരക്കഥാകൃത്തിലൊരാളായ ഗിരീഷ് ആണ് ചിത്രം സംവിധാനം ചെയ്യുന്നത്. ഗിരീഷും ഡിനോയ് പൗലോസും ചേര്‍ന്നാണ് ിത്രത്തിന് തിരക്കഥയൊരുക്കിയിരിക്കുന്നത്. വിനീത് ശ്രീനിവാസന്‍ ഇതുവരെ ചെയ്യാത്ത രീതിയിലുള്ള ക്യാരക്ടറാണ് തണ്ണീര്‍മത്തന്‍ ദിനങ്ങളിലേതെന്നാണ് ഡിനോയ് പറയുന്നത്.
“വളരെ രസകരമായ ക്യാരക്ടറാണ് സിനിമയില്‍ വിനീതേട്ടന്റേത്. അദ്ദേഹം ഇതുവരെ ചെയ്യാത്ത രീതിയിലുള്ള ക്യാരക്ടറാണ് ഇതിലേത്. വളരെ ആശ്വദിച്ച് രസകരമായി തന്നെയാണ് അദ്ദേഹം ആ ക്യാരക്ടറിനെ അവതരിപ്പിച്ചിരിക്കുന്നത്. പ്ലസ് വണ്‍ പ്ലസ്ടു കാലത്തിന്റെ കഥ പറയുന്ന ചിത്രമാണിത്. ഈ വിഭാഗത്തില്‍പ്പെടുന്ന ചിത്രങ്ങളില്‍ നിന്ന് വ്യത്യസ്തമായി പ്രായത്തോട് നീതി പുലര്‍ത്തുന്ന ചിത്രമാണിത്. 18 വയസ് വരെ പ്രായമുള്ള കുട്ടികളെയാണ് ഇതില്‍ അണിനിരത്തിയിരിക്കുന്നത്.” ഡിനോയ് പറഞ്ഞു.
ചിത്രത്തില്‍ ഒരു അധ്യാപകന്റെ വേഷത്തിലാണ് വിനീത് എത്തുന്നത്. ചിത്രത്തിലെ ജാതിക്കാ തോട്ടത്തിലെ എന്ന ഗാനം ഇതിനോടകം ഹിറ്റായി കഴിഞ്ഞു. സുഹൈല്‍ കോയയുടെ വരികള്‍ക്ക് ജസ്റ്റിന്‍ വര്‍ഗീസ് ഈണമിട്ടിരിക്കുന്ന ഈ ഗാനം സൗമ്യ രാമകൃഷ്ണനും ദേവദത്ത് ബിജിബാലും ചേര്‍ന്നാണ് ആലപിച്ചിരിക്കുന്നത്. ജോമോന്‍ ടി ജോണ്‍. ഷെബിന്‍ ബക്കര്‍, ഷമീര്‍ മുഹമ്മദ് എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്.
