‘ജാന്‍-എ-മന്‍’ എന്ന സിനിമയ്ക്ക് ശേഷം ചിതംബരത്തിന്റെ സംവിധാനത്തിലൊരുങ്ങുന്ന പുതിയ ചിത്രം വരുന്നു. ‘മഞ്ഞുമ്മല്‍ ബോയ്‌സ്’ എന്ന് പേരിട്ടിരിക്കുന്ന ചിത്രത്തില്‍ സൗബിനും ശ്രീനാഥ് ഭാസിയുമാണ് പ്രധാന വേഷങ്ങള്‍ അവതരിപ്പിക്കുന്നതെന്നാണ് റിപ്പോര്‍ട്ട്.
‘പറവ’, ‘കുമ്പളങ്ങി നൈറ്റ്‌സ്’, ‘ഭീഷ്മ പര്‍വ്വം’ എന്നീ സിനിമകള്‍ക്ക് ശേഷം ശ്രീനാഥ് ഭാസിയും സൗബിന്‍ ഷാഹിറും ഒന്നിക്കുന്ന ചിത്രം കൂടിയാണ് മഞ്ഞുമ്മല്‍ ബോയ്‌സ്. സിനിമയുടെ നിര്‍മ്മാണം സൗബിനാകും എന്ന വാര്‍ത്തകളും ഉണ്ട്. ചിത്രത്തിന്റെ ഛായാഗ്രഹണം ഷൈജു ഖാലിദ് ആണ്.
അജയന്‍ ചാലിശ്ശേരിയാണ് കലാസംവിധാനം. ബേസില്‍ ജോസഫ് പ്രധാന വേഷത്തിലെത്തി ബാലു വര്‍ഗീസ്, ലാല്‍, അര്‍ജുന്‍ അശോകന്‍, ഗണപതി എന്നിവര്‍ ചേര്‍ന്നഭിനയിച്ച ചിതംബരത്തിന്റെ ആദ്യ ചിത്രം ജാന്‍ എ മന്‍ മികച്ച അഭിപ്രായം നേടിയ ചിത്രമായിരുന്നു.
ബോക്‌സ് ഓഫീസില്‍ ഇടം നേടിയ സിനിമയില്‍ ജോയ്‌മോനായെത്തിയ ബേസിലിന്റെ പ്രകടനത്തിന് കയ്യടി ലഭിച്ചിരുന്നു. ചിതംബരത്തിന്റെ പുതിയ ചിത്രവും കൂടുതല്‍ പ്രതീക്ഷ നല്‍കുന്നതാണ് എന്നാണ് സോഷ്യല്‍മീഡിയയിലെ പ്രതികരണം.