ഫെബ്രുവരി 22 മുതല്‍ തിയേറ്ററുകള്‍ അടച്ചിടുമെന്ന തീരുമാനം എടുത്തിരിക്കുകയാണ് തിയേറ്ററുടമകള്‍. മലയാളത്തില്‍ പുതിയ റിലീസുകള്‍ അനുവദിക്കില്ല എന്നാണ് തിയേറ്ററുടമകളുടെ തീരുമാനം. എന്നാല്‍ ഫിയോക്കിന്റെ തീരുമാനം തള്ളി രംഗത്തെത്തിയിരിക്കുകയാണ് നിര്‍മ്മാതാക്കളുടെ സംഘടനയും വിതരണക്കാരുടെ സംഘടനയും.
ഫെബ്രുവരി 23ന് റിലീസിന് ഒരുങ്ങുന്ന ‘ഫാമിലി’ അന്ന് തന്നെ തിയേറ്ററുകളില്‍ എത്തുമെന്ന് സംവിധായകന്‍ ഡോണ്‍ പാലാത്തറ സൗത്ത്‌ലൈവിനോട് പ്രതികരിച്ചു. ‘മഞ്ഞുമ്മല്‍ ബോയ്‌സ്’ അടക്കമുള്ള ചിത്രങ്ങളുടെ റിലീസ് നിശ്ചയിച്ച തിയതികളില്‍ തന്നെ തിയേറ്ററിലെത്തുമെന്നും നിര്‍മ്മാതാക്കളുടെ സംഘടനയും വിതരണക്കാരുടെ സംഘടനയും അറിയിച്ചിട്ടുണ്ട്.
എന്നാല്‍ ഈ സംഘടനകളോട് നല്ല ബന്ധം പുലര്‍ത്തുന്ന തിയേറ്ററുകളില്‍ മാത്രമാണ് ഈ ചിത്രങ്ങള്‍ പ്രദര്‍ശിപ്പിക്കുക. ഈ തിയേറ്ററുകളുമായി തുടര്‍ന്നും സഹകരിക്കുമെന്നും സംഘടനകള്‍ അറിയിച്ചു. ചിത്രം പ്രദര്‍ശിപ്പിക്കാത്ത തിയേറ്ററുകളുമായി തുടര്‍ സഹകരണം വേണ്ടതില്ല എന്നാണ് തീരുമാനം.
സിനിമകള്‍ തിയേറ്ററിലെത്തി 42 ദിവസത്തിന് ശേഷം മാത്രമേ ഒ.ടി.ടി പ്ലാറ്റ്‌ഫോമുകള്‍ക്ക് നല്‍കാവൂ എന്ന സത്യവാങ്മൂലം ഫിലിം ചേംബറില്‍ നല്‍കാറുണ്ട്. എന്നാല്‍ പല നിര്‍മ്മാതാക്കളും ഇത് തെറ്റിച്ച് സിനിമകള്‍ നേരത്തെ ഒ.ടി.ടിക്ക് നല്‍കുന്നു എന്നാണ് ഫിയോക് പറയുന്നത്. ഇത് തിയേറ്ററുടമകള്‍ക്ക് നഷ്ടമുണ്ടാക്കുന്നു എന്നാണ് അവരുടെ വാദം.
കൂടാതെ, സിംഗിള്‍ സ്‌ക്രീന്‍ ഉള്ള തിയേറ്ററുടമകളെ നിര്‍മ്മാതാക്കള്‍ തരംതാഴ്ത്തുകയും മള്‍ട്ടിപ്ലെക്സുകളെ സഹായിക്കാന്‍ നിര്‍മ്മാതാക്കള്‍ മുന്‍കൈ എടുക്കുന്നുവെന്ന ആരോപണവും ഫിയോക് ഉന്നയിക്കുന്നുണ്ട്. അതും തിയേറ്ററുടമകളുടെ പ്രതിഷേധത്തിന് കാരണമായിട്ടുണ്ട്.