റാം സംവിധാനം ചെയ്യുന്ന ചിത്രത്തില്‍ നായകനായി നിവിന്‍ പോളി. ‘യേഴ് കടല്‍ യേഴ് മലൈ’ എന്ന ചിത്രത്തിലെ ക്യാരക്ടര്‍ പോസ്റ്റര്‍ പുറത്ത്. ‘പേരന്‍പ്’, ‘തങ്കമീന്‍കള്‍’, ‘തരമണി’ എന്നീ ഹിറ്റ് ചിത്രങ്ങള്‍ക്ക് ശേഷം റാം ഒരുക്കുന്ന സിനിമയാണിത്. കയ്യില്‍ ആയുധവുമായി മുടി നീട്ടി വളര്‍ത്തിയുള്ള നിവിനെയാണ് പോസ്റ്ററില്‍ കാണാനാവുക.
2017ല്‍ പുറത്തിറങ്ങിയ ‘റിച്ചി’ എന്ന ചിത്രത്തിന് ശേഷം നിവിന്‍ പോളി അഭിനയിക്കുന്ന തമിഴ് ചിത്രമാണ് ‘യേഴ് കടല്‍ യേഴ് മലൈ’. തമിഴ് നടന്‍ സൂരിയും ഒരു പ്രധാന കഥാപാത്രത്തെ അവതരിപ്പിക്കുന്നു, അഞ്ജലിയാണ് നായിക. ‘മാനാട്’ എന്ന ബ്ലോക്ക്ബസ്റ്റര്‍ തമിഴ് ചിത്രത്തിന് ശേഷം സുരേഷ് കാമാച്ചിയുടെ വി ഹൗസ് പ്രൊഡക്ഷന്‍സാണ് ഈ ബിഗ് ബജറ്റ് ചിത്രം നിര്‍മ്മിക്കുന്നത്.
ലിറ്റില്‍ മാസ്ട്രോ യുവന്‍ ശങ്കര്‍ രാജയാണ് സംഗീത സംവിധാനം. ഏകാംബ്രം ആണ് ഛായാഗ്രഹണം നിര്‍വ്വഹിച്ചിരിക്കുന്നത്. പ്രൊഡക്ഷന്‍ ഡിസൈനര്‍ ഉമേഷ് ജെ കുമാര്‍, എഡിറ്റര്‍ മതി വിഎസ്, ആക്ഷന്‍ സ്റ്റണ്ട് സില്‍വ, കൊറിയോഗ്രാഫര്‍ സാന്‍ഡി, ബോളിവുഡ് കോസ്റ്റ്യൂം ഡിസൈനര്‍ ചന്ദ്രകാന്ത് സോനവാനെ, ദേശീയ അവാര്‍ഡ് ജേതാവ് പട്ടണം റഷീദ് എന്നിവര്‍ ഈ സിനിമയില്‍ പ്രവര്‍ത്തിച്ചിട്ടുണ്ട്. പി.ആര്‍.ഒ-ശബരി.
അതേസമയം, ‘സാറ്റര്‍ഡേ നൈറ്റ്’ ആണ് നിവിന്‍ പോളിയുടെതായി ഒടുവില്‍ തിയേറ്ററുകളില്‍ എത്തിയത്. രാജീവ് രവിയുടെ സംവിധാനത്തില്‍ ഒരുങ്ങിയ ‘തുറമുഖം’ ആണ് താരത്തിന്റെതായി ഇനി റിലീസിന് ഒരുങ്ങുന്നത്. കൊവിഡ് പശ്ചാത്തലത്തില്‍ റിലീസ് തിയതി മാറ്റിയ ചിത്രത്തിന്റെ പുതിയ റിലീസ് തിയതി പുറത്തു വിട്ടിട്ടില്ല.