Connect with us

FILM NEWS

ഒടിയന്‍ സിനിമയുടെ സംവിധായകനെ മാറ്റിയോ? സത്യം ഇതാണ്

, 6:59 pm

മോഹന്‍ലാല്‍ നായകനായി എത്തുന്ന ബ്രഹ്മാണ്ഡചിത്രം ഒടിയന്‍ അവസാന ഘട്ട ചിത്രീകരണ ജോലിയിലേക്ക് പ്രവേശിക്കുന്ന സമയത്ത് വന്ന വാര്‍ത്തയാണ് സിനിമാ ലോകത്ത് അമ്പരപ്പുണ്ടാക്കിയത്. ചിത്രത്തിന്റെ സംവിധായകനായ ശ്രീകുമാര്‍ മേനോനെ മാറ്റി പകരം ശിക്കാര്‍ അടക്കമുള്ള ചിത്രങ്ങളുടെ സംവിധായകനായ പത്മകുമാറിനെ ചുമതല ഏല്‍പ്പിക്കാന്‍ തീരുമാനിച്ചുവെന്നുള്ള വാര്‍ത്തയാണ് സോഷ്യല്‍ മീഡിയയില്‍ പ്രചരിച്ചത്. പരസ്യ സംവിധായകനെന്ന നിലയില്‍ ശ്രദ്ധേയനാണെങ്കിലും ശ്രീകുമാറിന്റെ സിനിമാ സംവിധാനത്തില്‍ മോഹന്‍ലാലിനു അതൃപ്തിയുണ്ടായതാണ് മാറ്റാന്‍ കാരണമെന്നും വാര്‍ത്ത വന്നിരുന്നു.

എന്നാല്‍ ചിത്രത്തിന്റെ ലൊക്കേഷനില്‍ സ്റ്റണ്ട് മാസ്റ്റര്‍ പീറ്റര്‍ ഹെയ്‌നും സംവിധായകന്‍ ശ്രീകുമാര്‍ മേനോനും തമ്മിലുള്ള പോരാണ് ഇത്തരം വാര്‍ത്തകളിലേക്കെത്തിച്ചതെന്നാണ് റിപ്പോര്‍ട്ടുകള്‍. ഇരുവര്‍ക്കുമിടയില്‍ അത്രശുഭകരമായ കാര്യങ്ങളല്ല നടക്കുന്നതെന്നാണ് ചിത്രവുമായി ബന്ധപ്പെട്ട കേന്ദ്രങ്ങള്‍ നല്‍കുന്ന സൂചന. രണ്ടുപേരും പരസ്പരം അങ്ങോട്ടും ഇങ്ങോട്ടുമുള്ള നിര്‍ദേശങ്ങള്‍ അംഗീകരിക്കാതായതോടെ ലൊക്കേഷനില്‍ അണിയറ പ്രവര്‍ത്തകര്‍ തന്നെ രണ്ട് ചേരിയായി. ഇതോടെയാണ് സംവിധായകനെ മാറ്റിയെന്നുള്ള വാര്‍ത്തകള്‍ പ്രചരിക്കാന്‍ തുടങ്ങിയത്.

ആക്ഷന്‍ രംഗങ്ങളാണ് ചിത്രത്തിന്റെ ഹൈലൈറ്റ് എന്ന് നേരെത്തെ വ്യക്തമായിരുന്നു. അതുകൊണ്ടു തന്നെ സംഘട്ടന രംഗങ്ങള്‍ക്ക് മേല്‍നോട്ടം വഹിക്കുന്ന പീറ്റര്‍ ഹെയ്‌ന്റെ നിര്‍ദേശം ശ്രീകുമാര്‍ മോനോന്‍ അംഗീകരിക്കാത്തത് എന്തുകൊണ്ടാണെന്നാണ് ഉയരുന്ന ചോദ്യം. പുലിമുരകുന്‍ ചിത്രത്തില്‍ ഗംഭീര ആക്ഷന്‍ രംഗങ്ങളൊരുക്കി മലയാളികളുടെ കയ്യടി നേടിയ പീറ്റര്‍ ഹെയ്ന്‍. അതേസമയം അന്താരാഷ്ട്ര നിലവാരത്തിലാണ് ഒടിയന്റെ ആക്ഷന്‍ രംഗങ്ങളും ഒരുക്കുന്നത്. നാല് ലൊക്കേഷനുകളിലായാണ് ഇതിന്റെ ക്ലൈമാക്സ് ചിത്രീകരിച്ചിരിക്കുന്നത്.

അതേസമയം, സോഷ്യല്‍ മീഡിയകളില്‍ പ്രചരിച്ചിരുന്ന വാര്‍ത്തകള്‍ തികച്ചും വ്യാജമാണെന്നാണ് ചിത്രവുമായി അടുത്ത വൃത്തങ്ങള്‍ വ്യക്തമാക്കുന്നത്. നടക്കുന്നത് വ്യാജ പ്രചരണമാണെന്ന് ശ്രീകുമാര്‍ മേനോന്‍ ഒരു ട്വീറ്റിന് മറുപടി കൊടുത്തതായുള്ള സ്‌ക്രീന്‍ ഷോട്ടുകളും പ്രചരിക്കുന്നുണ്ട്. ഓഗസ്റ്റ് അവസാനത്തില്‍ ചിത്രീകരണം ആരംഭിച്ച ചിത്രം അടുത്ത വര്‍ഷമാണ് തിയേറ്ററുകളിലെത്തുന്നത്.

പ്രേതസിനിമായായല്ല ഒടിയന്‍ ഒരുങ്ങുന്നതെന്ന് സംവിധായകന്‍ തന്നെ വ്യക്തമാക്കിയിരുന്നു. അതേസമയം, മോഹന്‍ലാല്‍ അഭിനയിക്കുന്ന മാണിക്യന്‍ എന്ന കഥാപാത്രം കായിക ക്ഷമതയില്‍ മറ്റുള്ളവരേക്കാള്‍ മുന്നില്‍ നില്‍ക്കുന്നയാളാണെന്നും ശ്രീകുമാര്‍ മേനോന്‍ പറഞ്ഞിരുന്നു. മോഹന്‍ലാലിനെ കൂടാതെ മഞ്ജുവര്യര്‍, പ്രകാശ് രാജ്, നരേന്‍ തുടങ്ങിയവരും ചിത്രത്തിലെത്തുന്നുണ്ട്.