തെലുങ്ക് റീമേക്കിന് ശേഷം “ദൃശ്യം 2” ഹിന്ദിയിലേക്ക്. ചിത്രത്തിന്റെ ഹിന്ദി റീമേക്ക് അവകാശങ്ങള്‍ കുമാര്‍ മങ്കത് പതക്, അഭിഷേക് പതക് എന്നിവരുടെ പനോരമ സ്റ്റുഡിയോസ് ഇന്റര്‍നാഷണല്‍ ആണ് കരസ്ഥമാക്കിയിരിക്കുന്നത്. ദൃശ്യം ആദ്യ ഭാഗം ഹിന്ദിയില്‍ ഹിറ്റായിരുന്നു.
അജയ് ദേവ്ഗണ്‍ നായകനായ ചിത്രത്തില്‍ ശ്രിയ ശരണ്‍, തബു എന്നിവരാണ് മുഖ്യവേഷത്തില്‍ എത്തിയത്. ചിത്രം നൂറു കോടി ക്ലബ്ബില്‍ ഇടം നേടിയിരുന്നു. അന്തരിച്ച സംവിധായകന്‍ നിഷികാന്ത് കമ്മത്ത് ആണ് ചിത്രം ഒരുക്കിയത്. അതേസമയം, ഹിന്ദി പതിപ്പ് ജീത്തു ജോസഫ് ആയിരിക്കില്ല സംവിധാനം ചെയ്യുക.
തെലുങ്ക് ചിത്രത്തിന്റെ ചിത്രീകരണം നടക്കുന്നതിനാലും എത്രയും പെട്ടെന്ന് ഹിന്ദി ചിത്രീകരണം തുടങ്ങാന്‍ നിര്‍മ്മാതാക്കള്‍ക്ക് ആഗ്രഹമുള്ളതിനാലുമാണ് പിന്‍മാറുന്നത് എന്നാണ് ജീത്തു ജോസഫ് പറഞ്ഞത്. ചിത്രത്തിന്റെ സംവിധായകനെ കുറിച്ചും അഭിനേതാക്കളെ കുറിച്ചുമുള്ളഒരു വിവരങ്ങളും ഇതുവരെ പുറത്തു വിട്ടിട്ടില്ല.
ഫെബ്രുവരി 19ന് ആണ് ദൃശ്യം 2 ആമസോണ്‍ പ്രൈമില്‍ റിലീസ് ചെയ്തത്. മികച്ച സ്വീകരണമാണ് ചിത്രത്തിന് ലഭിച്ചത്. ആദ്യ ഭാഗത്തേക്കാള്‍ മികച്ചതായി രണ്ടാം ഭാഗം എന്ന അഭിപ്രായങ്ങളും പ്രേക്ഷകരില്‍ നിന്നും ഉയര്‍ന്നിരുന്നു.