സല്യൂട്ട് ചിത്രത്തിന്റെ പുതിയ പോസ്റ്റര്‍ പങ്കുവെച്ച ദുല്‍ഖര്‍ സല്‍മാന് ട്രോളുകള്‍. മമ്മൂട്ടിയുടെ പൊലീസ് വേഷത്തിലുള്ള ചിത്രങ്ങളും കമന്റുകളുമാണ് പോസ്റ്ററിന് കമന്റുകളായി ലഭിക്കുന്നത്. സമരങ്ങള്‍ക്ക് നടുവില്‍ പൊലീസ് വേഷത്തില്‍ നില്‍ക്കുന്ന ദുല്‍ഖര്‍ സല്‍മാനെയാണ് പോസ്റ്ററില്‍ കാണാനാവുക.
റോഷന്‍ ആന്‍ഡ്രൂസ് സംവിധാനം ചെയ്യുന്ന സല്യൂട്ടില്‍ മുഴുനീള പൊലീസ് വേഷത്തിലാണ് ദുല്‍ഖര്‍ എത്തുന്നത്. ട്രോളുകളായി എത്തുന്ന കമന്റുകള്‍ക്ക് ദുല്‍ഖര്‍ ആരാധകര്‍ മറുപടി കൊടുക്കുന്നുമുണ്ട്. കോവിഡ് ലോക്ഡൗണിനിടെ സിനിമാപ്രേമികള്‍ക്ക് പ്രതീക്ഷ നല്‍കി കൊണ്ടാണ് ദുല്‍ഖര്‍ പോസ്റ്റര്‍ പങ്കുവച്ചിരിക്കുന്നത്.
“”ഒരു ദിവസം ഇതെല്ലാം കടന്നുപോകും, നിങ്ങള്‍ എല്ലാവരും കാണാന്‍ ആഗ്രഹിക്കുന്ന സിനിമകള്‍ ഒരുക്കുന്നതിലേക്ക് ഞങ്ങള്‍ മടങ്ങും. നിങ്ങള്‍ അങ്ങനെ ചെയ്യുമ്പോള്‍, ഒരുപക്ഷേ, ആ ചെറിയ നിമിഷങ്ങളില്‍ ഇത് ഒരിക്കലും ഇനി സംഭവിക്കാത്തതു പോലെയാകും”” എന്നാണ് താരം ഫെയ്‌സ്ബുക്കില്‍ കുറിച്ചിരിക്കുന്നത്.
വേഫറെര്‍ ഫിലിംസിന്റെ ബാനറില്‍ ദുല്‍ഖര്‍ നിര്‍മ്മിക്കുന്ന അഞ്ചാമത്തെ ചിത്രമാണ് സല്യൂട്ട്. ബോളിവുഡ് താരവും മോഡലുമായ ഡയാന പെന്റി ആണ് നായിക. മനോജ് കെ ജയന്‍, അലന്‍സിയര്‍, ബിനു പപ്പു, വിജയകുമാര്‍, ലക്ഷ്മി ഗോപാല സ്വാമി, സാനിയ ഇയ്യപ്പന്‍ തുടങ്ങിയ താരങ്ങളും പ്രധാന വേഷങ്ങളില്‍ എത്തുന്നു.