പിടികിട്ടാപ്പുള്ളിയായ “കുറുപ്പി”ല്‍ നിന്നും 20 ദിവസത്തെ അവധി എടുത്ത് ദുല്‍ഖര്‍. സെപ്റ്റംബര്‍ 20ന് റിസലീസ് ചെയ്യുന്ന ബോളിവുഡ് ചിത്രം “ദ സോയാ ഫാക്ടറി”ന്റെ പ്രൊമോഷന്‍ പരിപാടികളില്‍ പങ്കെടുക്കാനായാണ് ദുല്‍ഖര്‍ അവധിയെടുത്ത് മുംബൈയിലേക്ക് പറന്നിരിക്കുന്നത്.
സോനം കപൂര്‍ നായികയാകുന്ന ചിത്രത്തില്‍ ഇന്ത്യന്‍ ക്രിക്കറ്റ് ടീം ക്യാപ്റ്റനായാണ് ദുല്‍ഖര്‍ എത്തുന്നത്. അനൂജ ചൗഹാന്‍ എഴുതിയ “ദ സോയാ ഫാക്ടര്‍” എന്ന നോവലിനെ ആസ്പദമാക്കി അഭിഷേക് ശര്‍മയാണ് ചിത്രം സംവിധാനം ചെയ്യുന്നത്.
“സെക്കന്റ് ഷോ”ക്ക് ശേഷം ശ്രീനാഥ് രാജേന്ദ്രനും ദുല്‍ഖറും വീണ്ടും ഒന്നിക്കുന്ന ചിത്രമാണ് “കുറുപ്പ്.” രണ്ട് ദിവസത്തെ ഷൂട്ടിങ്ങിന് പിന്നാലെ അവധി എടുത്ത ദുല്‍ഖര്‍ സെപ്റ്റംബര്‍ 25ന് തിരിച്ചെത്തും. ദുല്‍ഖര്‍ സല്‍മാന്റെ നിര്‍മ്മാണ കമ്പനിയായ വെ ഫെയറര്‍ ഫിലിംസ് എം സ്റ്റാര്‍ പ്രൊഡക്ഷന്‍സുമായി ചേര്‍ന്ന് നിര്‍മ്മിക്കുന്ന ചിത്രത്തില്‍ സണ്ണിവയ്ന്‍, ഇന്ദ്രജിത്ത്, ഷൈന്‍ ടോം ചാക്കോ തുടങ്ങിയവരും പ്രധാന വേഷത്തിലെത്തുന്നുണ്ട്.