മായാനദി, മഹേഷിന്റെ പ്രതികാരം, കുമ്പളങ്ങി നൈറ്റ്സ്, ഹലാൽ ലവ് സ്റ്റോറി, മറഡോണ, നാരദൻ, നീലവെളിച്ചം തുടങ്ങിയ ചിത്രങ്ങളുടെ എഡിറ്റർ ആയി പ്രവർത്തിച്ച സൈജു ശ്രീധരൻ സംവിധായകനായി വീണ്ടും വരുന്നു. ‘മുൻപേ’ എന്ന് പേരിട്ടിരിക്കുന്ന ചിത്രത്തിൽ ടൊവിനോ തോമസാണ് നായകനായെത്തുന്നത്.
ചിത്രത്തിന്റെ ടൈറ്റിൽ പോസ്റ്റർ സൈജു ശ്രീധരൻ തന്നെയാണ് സോഷ്യൽ മീഡിയയിലൂടെ പങ്കുവെച്ചിരിക്കുന്നത്. ടീന തോമസാണ് ചിത്രത്തിന് തിരക്കഥയെഴുതിയിരിക്കുന്നത്. അതേസമയം സൈജു ശ്രീധരൻ സംവിധാനം ചെയ്യുന്ന ആദ്യ ചിത്രം ‘ഫൂട്ടേജ്’ എന്ന ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ പുരോഗമിച്ചുകൊണ്ടിരിക്കുകയാണ്. മഞ്ജു വാര്യർ, വിശാഖ് നായർ, ഗായത്രി അശോക് എന്നിവരാണ് ഫൂട്ടേജിൽ പ്രധാന കഥാപാത്രങ്ങളായെത്തുന്നത്.
ചിത്രത്തിന് പശ്ചാത്തല സംഗീതമൊരുക്കുന്നത് സുഷിൻ ശ്യാമും ഗാനങ്ങളൊരുക്കുന്നത് റെക്സ് വിജയനുമാണ്.
ഡോൾവിൻ കുര്യാക്കോസ് ആണ് ചിത്രം നിർമ്മിക്കുന്നത്. ചിത്രത്തിന്റെ പ്രീ പ്രൊഡക്ഷൻ ജോലികൾ ആരംഭിച്ചിട്ടുണ്ട്.
നിങ്ങൾക്ക് നഷ്ടമായവർക്ക് വേണ്ടി എത്ര ദൂരം നിങ്ങൾ പോകും? എന്ന ടാഗ് ലൈനാണ് ഇപ്പോൾ പുറത്തുവിട്ടിരിക്കുന്ന ടൈറ്റിൽ പോസ്റ്ററിലുള്ളത്. ചിത്രം ഈ വർഷം അവസാനത്തോടെ തിയേറ്ററുകളിൽ എത്തുമെന്നാണ് റിപ്പോർട്ടുകൾ.