41-ാം ജന്മദിനം ആഘോഷിക്കുകയാണ് ആരാധകരുടെ പ്രിയതാരം ധനുഷ്. ഇന്ത്യന്‍ സിനിമയില്‍ തന്നെ ഏറ്റവും മികച്ച താരങ്ങളില്‍ ഒരാളായ ധനുഷിനെ വ്യത്യസ്തനാക്കുന്നത് അദ്ദേഹത്തിന്റെ കഥാപാത്രങ്ങള്‍ തന്നെയാണ്. താരത്തിനെ ആശംസകൾ കൊണ്ട് മൂടുകയാണ് ആരാധകരും സഹതാരങ്ങളും. ധനുഷിനെ കുറിച്ച് അധികം അറിയപ്പെടാത്ത ചില കാര്യങ്ങൾ.
ഒരിക്കലും ഒരു അഭിനേതാവാകുമെന്ന് ധനുഷ് സ്വപ്നം കണ്ടിരുന്നില്ല. ഒരു ഷെഫ് ആകണം എന്നായിരുന്നു താരത്തിന്റെ ആഗ്രഹം. അതുകൊണ്ട് തന്നെ ധനുഷ് ഹോട്ടൽ മാനേജ്‌മെൻ്റ് പഠിക്കാൻ ആഗ്രഹിച്ചിരുന്നു.
ധനുഷിൻ്റെ ജ്യേഷ്ഠനും സംവിധായകനുമായ സെൽവരാഘവനാണ് അഭിനയത്തിലേക്ക് വരാൻ താരത്തെ സമ്മർദ്ദത്തിലാക്കിയത്. ധനുഷിന് 16 വയസ്സുള്ളപ്പോൾ പ്രണയപരാജയം ഉണ്ടായതായി ചില റിപോർട്ടുകൾ പറയുന്നു.
വെങ്കിടേഷ് പ്രഭു എന്നാണ് ധനുഷിൻ്റെ യഥാർത്ഥ പേര് എന്നത് എല്ലാവർക്കും അറിയാവുന്ന കാര്യമാണ്. എന്നാൽ കമൽഹാസൻ നായകനായ ‘കുരുതി പുനൽ’ എന്ന ചിത്രത്തിലെ മിഷൻ നാമത്തിൽ നിന്ന് പ്രചോദനം ഉൾക്കൊണ്ടാണ് ‘ധനുഷ്’ എന്ന സ്ക്രീൻ നാമം ഉപയോഗിച്ച് തുടങ്ങിയത്
2003ൽ കാതൽ കൊണ്ടേൻ എന്ന സിനിമയുടെ പ്രദർശനത്തിനിടെയാണ് ധനുഷ് തൻ്റെ മുൻ ഭാര്യ ഐശ്വര്യയെ ആദ്യമായി കാണുന്നത്. മറ്റൊരു കാര്യം ഭഗവാൻ ശിവനെ ആരാധിക്കുന്നയാളാണ് ധനുഷ്. താരത്തിന്റെ രണ്ട് ആൺമക്കളുടെ പേരുകൾ യാത്ര, ലിംഗ എന്നിവ ശിവൻ്റെ പേരുകളിൽ നിന്ന് ഉരുത്തിരിഞ്ഞതാണ്.
ഒരു വെജിറ്റേറിയൻ ആണ് ധനുഷ്. ശിവനെ ആരാധിക്കുകയും മന്ത്രങ്ങൾ പതിവായി പിന്തുടരുകയും ചെയ്യുന്ന ആളായതിനാൽ താരം സസ്യാഹാരിയായി മാറുകയായിരുന്നു. ‘3’ ലെ ലോകപ്രശസ്തമായ ‘കൊലവെറി ഡി’ എന്ന ഗാനത്തിൻ്റെ വരികൾ ധനുഷ് എഴുതിയത് വെറും 6 മിനിറ്റിലാണ്. ആദ്യ റെക്കോർഡിംഗ് 35 മിനിറ്റിനുള്ളിൽ പൂർത്തിയാക്കുകയും ചെയ്തിരുന്നു.
നടൻ, സംവിധായകൻ, നിർമ്മാതാവ് എന്നീ മേഖലകളിൽ പ്രവർത്തിക്കുന്നുണ്ടെങ്കിലും ധനുഷിന് സംഗീതത്തിൽ പ്രത്യേക താൽപ്പര്യമുണ്ട്. അതുകൊണ്ടാണ് അദ്ദേഹം പതിവായി പാട്ടുകൾ പാടുകയും വരികൾ എഴുതുകയും ചെയ്യുന്നത്.