നടി ശീതള്‍ തമ്പിയുടെ പരാതി തള്ളി ‘ഫൂട്ടേജ്’ സിനിമയുടെ നിര്‍മ്മാതാക്കള്‍. അപകടം ഉണ്ടായപ്പോള്‍ വേണ്ട ചികിത്സ നല്‍കി എന്നാണ് നിര്‍മ്മാതാക്കള്‍ പറയുന്നത്. പരിക്കേറ്റ് വിശ്രമിക്കുമ്പോഴും സഹായം നല്‍കിയെന്നും നിര്‍മ്മാതാക്കളായ മൂവി ബക്കറ്റ് വ്യക്തമാക്കി.
എന്നാല്‍ ഷൂട്ടിംഗ് ലൊക്കേഷനില്‍ വച്ച് പരിക്കേറ്റ തനിക്ക് ചികിത്സാ സഹായം ലഭിച്ചില്ല എന്നാണ് ശീതള്‍ തമ്പിയുടെ പരാതി. സെറ്റില്‍ ആംബുലന്‍സ് പോലും ഒരുക്കിയില്ലെന്നും പാരതിയില്‍ പറയുന്നുണ്ട്. അഞ്ച് കോടി നഷ്ടപരിഹാരം നല്‍കണം എന്നാണ് വക്കീല്‍ നോട്ടീസില്‍ ആവശ്യപ്പെട്ടിരിക്കുന്നത്.
ഫൂട്ടേജിന്റെ നിര്‍മ്മാതാവ് കൂടിയായ മഞ്ജു വാര്യര്‍ക്കും നിര്‍മ്മാണ കമ്പനി മൂവി ബക്കറ്റിലെ പാര്‍ട്ണറായ ബിനീഷ് ചന്ദ്രനും എതിരെയാണ് നടിയും അസിസ്റ്റന്റ് ഡയറക്ടറുമായ ശീതള്‍ തമ്പി വക്കീല്‍ നോട്ടീസ് അയച്ചിരിക്കുന്നത്. ചിമ്മിനി വനമേഖലയില്‍ നടന്ന ചിത്രീകരണത്തില്‍ ഒരു ഫൈറ്റ് സീനില്‍ ശീതള്‍ അഭിനയിച്ചിരുന്നു.
മതിയായ സുരക്ഷയില്ലാതെ ഷൂട്ട് ചെയ്യുകയും നിരവധി തവണ ഷൂട്ട് ചെയ്യേണ്ടി വന്നതിനാല്‍ ശീതളിന് പരിക്കുണ്ടായി എന്നുമാണ് വക്കീല്‍ നോട്ടീസില്‍ പറയുന്നത്. പരിക്കുമായി ബന്ധപ്പെട്ട് ശസ്ത്രക്രിയ തന്നെ നടത്തേണ്ടി വന്നു. ആശുപത്രിയില്‍ വലിയ രീതിയില്‍ പണം ചിലവായി.
പക്ഷേ നിര്‍മ്മാതാക്കള്‍ പല ഘട്ടങ്ങളിലായി നല്‍കിയത് ഒരു ലക്ഷത്തി എണ്‍പതിനായിരം രൂപ മാത്രമാണ്. നിലവില്‍ ജോലി ചെയ്യാന്‍ പറ്റാത്ത സാഹചര്യമാണ്. ഇതിന് ഉചിതമായ നഷ്ടപരിഹാരം നല്‍കാതെ മൂവി ബക്കറ്റ് മൗനം തുടരുകയാണെന്നും നഷ്ടപരിഹാരം വേണമെന്നുമാണ് വക്കീല്‍ നോട്ടീസില്‍ ആവശ്യപ്പെടുന്നത്.