വിഷ്ണു വിശാല്‍, ഐശ്വര്യ ലക്ഷ്മി എന്നിവരെ പ്രധാന കഥാപാത്രങ്ങളാക്കി ചെല്ല അയ്യാവു സംവിധാനം ചെയ്യുന്ന സ്‌പോര്‍സ് ഡ്രാമ ചിത്രമാണ് ഗാട്ട കുസ്തിയുടെ ട്രെയിലര്‍ റിലീസ് ചെയ്തു. . നാട്ടില്‍ തല്ലും ബഹളവുമായി നടക്കുന്ന യുവാവ് ആണ് വീര. എന്നാല്‍ താന്‍ കല്യാണം കഴിക്കുന്ന കുട്ടി നല്ല അടക്കവും ഒതുക്കവും ഉള്ള പാവമായിരിക്കണമെന്നാണ് വീരയുടെ ആഗ്രഹം. നാട്ടില്‍ വഴക്കാളിയായതുകൊണ്ട് സ്വന്തം നാട്ടില്‍ നിന്ന് വീരയ്ക്ക് വിവാഹം നടക്കുന്നില്ല.
അവസാനം കേരളത്തില്‍ നിന്നും കീര്‍ത്തി എന്ന കുട്ടിയെ വീര വിവാഹം കഴിക്കുന്നു. മൂക്കത്ത് ദേഷ്യമുള്ള, ഒന്നു പറഞ്ഞ് രണ്ടാമത് തല്ലിനറങ്ങുന്ന പെണ്‍കുട്ടിയാണ് കീര്‍ത്തി. കല്യാണത്തെ തുടര്‍ന്ന് ഇവരുടെ ജീവിതത്തിലുണ്ടാകുന്ന രസകരമായ സംഭവങ്ങളാണ് ചിത്രം പറയുന്നത്.
ഹരീഷ് പേരടി, ശ്രീജ രവി, അജയ്, കാളി വെങ്കട് എന്നിവരാണ് ചിത്രത്തിലെ മറ്റ് താരങ്ങള്‍. ജസ്റ്റിന്‍ പ്രഭാകരന്‍ ആണ് സംഗീതം. ചിത്രം ഡിസംബര്‍ 2ന് തിയറ്ററുകളിലെത്തും.
വിഷ്ണു വിശാലിന്റെ വിഷ്ണു വിശാല്‍ സ്റ്റുഡിയോസിന്റെയും തെലുങ്ക് താരം രവി തേജയുടെ ആര്‍ടി ടീം വര്‍ക്ക്‌സിന്റെയും സംയുക്ത നിര്‍മ്മാണ സംരംഭമായിരിക്കും. തെലുങ്കില്‍ മട്ടി കുസ്തി എന്ന പേരിലാണ് ചിത്രം പുറത്തിറങ്ങുക.
വെണ്ണില കബഡി കുഴു (2009) എന്ന ചിത്രത്തിലൂടെ അരങ്ങേറ്റം കുറിച്ച വിഷ്ണുവിന്റെ മൂന്നാമത്തെ കായിക ചിത്രമാണ് ഈ ചിത്രം. 2014-ല്‍ പുറത്തിറങ്ങിയ അദ്ദേഹത്തിന്റെ, ജീവ എന്ന സിനിമ ക്രിക്കറ്റ് കളിയെ ചുറ്റിപ്പറ്റിയുള്ള പ്രശ്‌നങ്ങളും രാഷ്ട്രീയവും കൈകാര്യം ചെയ്തിരുന്നു.