വര്‍ഷങ്ങള്‍ക്ക് മുമ്പ് ചിത്രീകരണം ആരംഭിച്ച ചിത്രമാണ് ‘ധ്രുവനച്ചത്തിരം’. വിക്രത്തെ നയകനാക്കി 2017ല്‍ ആയിരുന്നു ചിത്രത്തിന്റെ ഷൂട്ടിംഗ് തുടങ്ങിയത്. സ്‌പൈ ത്രില്ലര്‍ ഴോണറില്‍ ഒരുക്കിയ ചിത്രത്തിനായി സിനിമാപ്രേമികള്‍ കാത്തിരിക്കുകയാണ്. ചിത്രത്തിനായി ആദ്യം പരിഗണിച്ചിരുന്നത് സൂര്യയെ ആയിരുന്നു.
2013ല്‍ സൂര്യയെ നായകനാക്കി ചിത്രം പ്രഖ്യാപിച്ചെങ്കിലും ഷൂട്ടിംഗ് തുടങ്ങാനായില്ല. പിന്നീടാണ് ചിത്രത്തിലേക്ക് വിക്രം എത്തിയത്. എന്തുകൊണ്ടാണ് സിനിമയില്‍ നിന്നും സൂര്യ പിന്മാറിയത് എന്ന് തുറന്നു പറഞ്ഞിരിക്കുകയാണ് ഗൗതം മേനോന്‍ ഇപ്പോള്‍.
സൂര്യയ്ക്കായാണ് കഥ എഴുതിയത്, എന്നാല്‍ സിനിമയുടെ ആശയം താരത്തിന് കണക്ട് ആയില്ല. ധ്രുവനച്ചത്തിരത്തിന് റഫറന്‍സ് പോയിന്റ് ഇല്ല എന്നതാണ് താരത്തെ ആശങ്കപ്പെടുത്തിയത്. സ്‌പൈ ത്രില്ലറുകള്‍ തമിഴ് സിനിമയില്‍ മുമ്പ് ഉണ്ടായിട്ടില്ല എന്നതിനാല്‍ സിനിമ പ്രേക്ഷകരിലെത്തുമോ എന്നതില്‍ അദ്ദേഹം സംശയം പ്രകടിപ്പിച്ചു.
ഒരു സൗഹൃദ സംഭാഷണത്തിനിടെ പറഞ്ഞ കഥ വിക്രമിന് ഒരുപാട് ഇഷ്ടപ്പെട്ടു. അദ്ദേഹം സിനിമ ചെയ്യാന്‍ തയ്യാറാവുകയായിരുന്നു എന്നാണ് ഗൗതം മേനോന്‍ പറയുന്നത്. അത് മാത്രമല്ല ധ്രുവനച്ചത്തിരത്തിനായി നിര്‍മ്മാതാവിനെ കൊണ്ടുവന്നതും വിക്രമാണെന്നും സംവിധായകന്‍ വ്യക്തമാക്കി.
സിനിമയ്ക്ക് സീക്വല്‍ ഉണ്ടായാല്‍ അതില്‍ അഭിനയിക്കാനുള്ള താല്‍പര്യവും വിക്രം പ്രകടിപ്പിച്ചിരുന്നുവെന്നും ഗൗതം മേനോന്‍ സിനിമ എക്‌സ്പ്രസിന് നല്‍കിയ അഭിമുഖത്തില്‍ വെളിപ്പെടുത്തി. അതേസമയം, നവംബര്‍ 24ന് ആണ് ധ്രുവനച്ചത്തിരത്തിന്റെ റിലീസ്. മലയാളി താരം വിനായകനും ചിത്രത്തില്‍ ഒരു പ്രധാന വേഷത്തിലെത്തുന്നുണ്ട്.