ചോദ്യം മാറിപ്പോയ അവതാരകന് തഗ് മറുപടി നല്‍കി ഗൗതം മേനോന്‍. ”ചെക്ക ചിവന്ത വാനം സിനിമ ഷൂട്ട് വളരെ ബുദ്ധിമുട്ടേറിയതായിരിക്കുമല്ലോ? ചിമ്പു, വിജയ് സേതുപതി, അരവിന്ദ് സാമി… ഇവരെയൊക്കെ എങ്ങനെ മാനേജ് ചെയ്തു…” അവതാരകന്റെ ചോദ്യം.
മണിരത്‌നം സംവിധാനം ചെയ്ത് 2018ല്‍ പുറത്തിറങ്ങിയ ചിത്രമാണ് ചെക്ക ചിവന്ത വാനം. എന്നാല്‍ ഗൗതം മേനോന്‍ ഈ ചോദ്യം സ്വീകരിച്ചത് വളരെ രസകരമായാണ്. താനാണ് ചെക്ക ചിവന്ത വാനം സംവിധാനം ചെയ്തത് എന്ന രീതിയിലായിരുന്നു അദ്ദേഹത്തിന്റെ മറുപടി.
”സത്യം, വളരെ ബുദ്ധിമുട്ടേറിയ ഷൂട്ടായിരുന്നു. വിജയ് സേതുപതി, ചിമ്പു, അരുണ്‍ വിജയ്, അരവിന്ദ് സാമി ഇവരൊക്കെ തിരക്കേറിയ താരങ്ങളാണ്. ഇവരുടെയൊക്കെ ഡേറ്റ് വേണം. പക്ഷേ ഞാന്‍ മണിരത്‌നം ആണല്ലോ. അതുകൊണ്ട് തന്നെ വളരെ എളുപ്പത്തില്‍ ഇവരെയൊക്കെ എന്റെ സിനിമയില്‍ കൊണ്ടുവരാന്‍ സാധിച്ചു.”
”രാവിലെ 4.30 മണിക്ക് ഷൂട്ട് തുടങ്ങും. നടന്മാരെല്ലാം കൃത്യ സമയത്ത് തന്നെ സെറ്റിലെത്തും. ഗൗതം മേനോന്റെ സെറ്റില്‍ ചിമ്പു എത്തുന്നത് 7 മണിക്കാണെന്ന് നിങ്ങള്‍ കേട്ടിട്ടുണ്ടാകും. പക്ഷേ അദ്ദേഹം ഇവിടെ എനിക്ക് വേണ്ടി കൃത്യസമയത്ത് എത്തി” എന്നാണ് ഗൗതം മേനോന്‍ കൊടുത്ത മറുപടി.
ഈ അഭിമുഖവും ഗൗതം മേനോന്റെ മറുപടിയും സോഷ്യല്‍ മീഡിയയില്‍ വൈറല്‍ ആയിരിക്കുകയാണ്. സന്ദര്‍ഭം മനോഹരമായി കൈകാര്യം ചെയ്ത ഗൗതം മേനോനെ പ്രശംസിച്ച് ട്രോള്‍ വീഡിയോകളും പ്രത്യക്ഷപ്പെടുന്നുണ്ട്.