മമിത ബൈജുവിന്റെ തമിഴ് അരങ്ങേറ്റ ചിത്രം ‘റിബല്‍’ ഒ.ടി.ടിയിലേക്ക്. മാര്‍ച്ച് 22ന് തിയേറ്ററിലെത്തിയ ചിത്രം രണ്ടാഴ്ചയ്ക്ക് ശേഷമാണ് ഒ.ടി.ടിയില്‍ എത്തിയിരിക്കുന്നത്. ജി.വി പ്രകാശ് കുമാര്‍ നായകനായ ചിത്രം ആമസോണ്‍ പ്രൈമിലൂടെയാണ് സ്ട്രീമിംഗ് ആരംഭിച്ചിരിക്കുന്നത്.
യഥാര്‍ത്ഥ സംഭവങ്ങളെ ആസ്പദമാക്കിയുള്ള സിനിമയ്ക്ക് തിയേറ്ററില്‍ സമ്മിശ്ര പ്രതികരണം മാത്രമാണ് നേടാന്‍ കഴിഞ്ഞത്. 1980കളുടെ പശ്ചാത്തലത്തിലാണ് ചിത്രം കഥ പറയുന്നത്. കേരളത്തിലെ കോളേജില്‍ പഠിക്കാനെത്തുന്ന തമിഴ് യുവാവായാണ് ചിത്രത്തില്‍ ജി.വി പ്രകാശ് ചിത്രത്തില്‍ വേഷമിട്ടത്.
നവാഗതനായ നികേഷ് ആര് എസ് സംവിധാനം ചെയ്ത സിനിമയുടെ സംഗീതവും ജി വി പ്രകാശ് തന്നെയാണ് നിര്‍വഹിച്ചത്. വെങ്കിടേഷ് വി പി, ഷാലു റഹിം, കരുണാസ്, ആദിത്യ ഭാസ്‌കര്‍, കല്ലൂരി വിനോദ്, സുബ്രഹ്‌മണ്യ ശിവ, രാജേഷ് ശര്‍മ്മ തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിച്ചത്.
ഛായാഗ്രഹണം അരുണ്‍കൃഷ്ണ രാധാകൃഷ്ണന്‍, എഡിറ്റിംഗ് ലിയോ ജോണ്‍ പോള്‍, എഡിറ്റിംഗ് വെട്രി കൃഷ്ണന്‍, ആക്ഷന്‍ ശക്തി ശരവണന്‍, കലാസംവിധാനം പപ്പനാട് സി, ഉദയകുമാര്‍. ഇത്ര വേഗം ചിത്രം ഒ.ടി.ടിയില്‍ എത്തിയതിന്റെ അമ്പരപ്പ് പ്രേക്ഷകരും ട്രാക്കര്‍മാരുമൊക്കെ സോഷ്യല്‍ മീഡിയയിലൂടെ പ്രകടിപ്പിക്കുന്നുണ്ട്.