തരുണ്‍ മൂര്‍ത്തിയുടെ സംവിധാനത്തില്‍ ഒരുങ്ങുന്ന മോഹന്‍ലാല്‍ ചിത്രം പുരോഗമിച്ചു കൊണ്ടിരിക്കുകയാണ്. ചിത്രത്തിലെ ലൊക്കേഷനില്‍ നിന്നുള്ള ചിത്രങ്ങള്‍ തരുണ്‍ മൂര്‍ത്തി പങ്കുവച്ചിട്ടുണ്ട്. ഇതിനിടെ കമന്റുമായി എത്തിയ ഒരു ആരാധകന് മറുപടി കൊടുത്തിരിക്കുകയാണ് സംവിധായകന്‍.
സിനിമയുടെ പേര് ‘ബെന്‍സ് വാസു’ എന്നാണോ എന്ന ആരാധകന്റെ ചോദ്യത്തിനാണ് സംവിധായകന്‍ മറുപടി നല്‍കിയത്. ”ഇതൊക്കെ എവിടുന്ന് കണ്ട് പിടിക്കുന്നു. ഇങ്ങനെ ഒരു പേര് ആണോ വേണ്ടത്. ഞങ്ങള്‍ക്ക് സമയം തരൂ. ഞങ്ങള്‍ ഞങ്ങളുടെ ജോലികള്‍ പൂര്‍ത്തിയാക്കട്ടെ”എന്നാണ് തരുണ്‍ മൂര്‍ത്തിയുടെ മറുപടി.
അതേസമയം, ചിത്രത്തിന്റെ ടൈറ്റില്‍ ഇതുവരെ പ്രഖ്യാപിച്ചിട്ടില്ല. മോഹന്‍ലാലിന്റെ പിറന്നാള്‍ ദിനത്തില്‍ ടൈറ്റില്‍ പ്രഖ്യാപിക്കുമെന്ന് അഭ്യൂഹങ്ങള്‍ ഉണ്ടായിരുന്നെങ്കിലും ‘പേരിനായി കാത്തിരുപ്പ് തുടരുകയാണ് ഞങ്ങളും നിങ്ങളും” എന്നായിരുന്നു തരുണ്‍ മൂര്‍ത്തി മോഹന്‍ലാലിന്റെ പിറന്നാള്‍ ദിനത്തില്‍ ഫെയ്സ്ബുക്കില്‍ കുറിച്ചത്.
നേരത്തെ ബെന്‍സ് വാസു എന്ന പേരില്‍ നേരത്തെ ഒരു മോഹന്‍ലാല്‍ ചിത്രം പ്രഖ്യാപിച്ചിരുന്നു. എല്‍360യുടെ രചയിതാവ് കെ.ആര്‍ സുനിലിന്റെ തന്നെ തിരക്കഥയില്‍ ജി. പ്രജിത്ത് ആയിരുന്നു ചിത്രം ഒരുക്കേണ്ടിയിരുന്നത്. തരുണ്‍ മൂര്‍ത്തിയുടെ ചിത്രത്തിനും കെ.ആര്‍ സുനില്‍ തിരക്കഥ ഒരുക്കുന്നതിനാലാണ് ഇങ്ങനൊരു സംശയം എത്തിയത്.
റാന്നിക്കാരനായ ടാക്സി ഡ്രൈവര്‍ ഷണ്മുഖമായാണ് മോഹന്‍ലാല്‍ ചിത്രത്തിലെത്തുന്നത്. മലയാളത്തിലെ പ്രിയപ്പെട്ട താര ജോഡികളായ മോഹന്‍ലാല്‍-ശോഭന കോമ്പോ വീണ്ടുമൊന്നിക്കുന്നുവെന്ന പ്രത്യേകതയും ചിത്രത്തിനുണ്ട്. 2009ല്‍ റിലീസ് ചെയ്ത ‘സാഗര്‍ ഏലിയാസ് ജാക്കി’യില്‍ ആയിരുന്നു ഒടുവില്‍ ഇരുവരും ഒന്നിച്ച് അഭിനയിച്ചത്.