ഏറെ ആരാധക വൃന്ദമുള്ള പഞ്ചാബി ഗായകന്‍ ഹാര്‍ദി സന്ധുവിന്റെ വെളിപ്പെടുത്തല്‍ സാമൂഹ്യ മാധ്യമങ്ങളില്‍ വന്‍ ചര്‍ച്ചയാകുന്നു. കബീര്‍ഖാന്‍ നായകനായ 83 എന്ന ചിത്രത്തിലൂടെ ആയിരുന്നു ഹാര്‍ദി സന്ധുവിന്റെ ബോളിവുഡ് അരങ്ങേറ്റം. ഒരു സംഗീത പരിപാടിക്കിടെ മുതിര്‍ന്ന സ്ത്രീയില്‍ നിന്ന് ലൈംഗികാതിക്രമം നേരിട്ടതായാണ് ഹാര്‍ദി സന്ധു വെളിപ്പെടുത്തിയത്. രണ്ട് വര്‍ഷം മുന്‍പ് നടന്ന സംഭവമാണ് ഹാര്‍ദി തുറന്ന് പറഞ്ഞിരിക്കുന്നത്.
ഒരു വിവാഹ പാര്‍ട്ടിയ്ക്കിടെ വേദിയില്‍ പാട്ട് പാടുമ്പോഴായിരുന്നു സന്ധുവിന് 40 കഴിഞ്ഞ സ്ത്രീയില്‍ നിന്നും മോശം അനുഭവമുണ്ടായതെന്നാണ് ഇപ്പോള്‍ തുറന്ന് പറഞ്ഞിരിക്കുന്നത്. താന്‍ പാടുമ്പോള്‍ വേദിയ്ക്ക് മുന്നിലായി നൃത്തം ചെയ്യുകയായിരുന്ന സ്ത്രീ വേദിയില്‍ കയറി നൃത്തം ചെയ്യാന്‍ അനുവാദം ചോദിച്ചു. എന്നാല്‍ താന്‍ അത് നിരസിച്ചതായി ഹാര്‍ദി കൂട്ടിച്ചേര്‍ത്തു. സ്ത്രീ തുടരെ വേദിയില്‍ കയറി നൃത്തം ചെയ്യണമെന്ന് ആവശ്യപ്പെട്ടപ്പോള്‍ താന്‍ സമ്മതിച്ചതായും ഹാര്‍ദി പറഞ്ഞു.
ഒരു പാട്ടിന്റെ തുടക്കം മുതല്‍ അവസാനം വരെ ആ സ്ത്രീയുമൊത്ത് താന്‍ വേദിയില്‍ നൃത്തം ചെയ്തു. നൃത്തം അവസാനിച്ചപ്പോള്‍ നിങ്ങള്‍ക്ക് സന്തോഷമായില്ലേ എന്ന് താന്‍ ചോദിച്ചു. ഈ സമയം തന്നെ ആലിംഗനം ചെയ്യണമെന്ന് അവര്‍ ആവശ്യപ്പെട്ടു. എന്നാല്‍ തന്നെ കെട്ടിപ്പിടിക്കുന്നതിനിടയില്‍ ചെവിയില്‍ നാവ് കൊണ്ട് അവര്‍ സ്പര്‍ശിച്ചതായി ഹാര്‍ദി പറയുന്നു. ഇവിടെ സ്ത്രീകള്‍ക്ക് മാത്രമല്ല പുരുഷന്മാര്‍ക്ക് നേരെയും ലൈംഗികാതിക്രമങ്ങള്‍ നടക്കുന്നുണ്ടെന്നും ഗായകന്‍ പറഞ്ഞു.