‘ജയിലര്‍’ തിയേറ്ററില്‍ എത്തിയപ്പോള്‍ മോഹന്‍ലാലിന്റെ കാമിയോ റോള്‍ ഏറെ ശ്രദ്ധ നേടിയിരുന്നു. മാത്യൂ എന്ന കഥാപാത്രത്തിന് വന്‍ വരവേല്‍പ്പാണ് പ്രേക്ഷകര്‍ നല്‍കിയത്. ചിത്രം ഒ.ടി.ടിയില്‍ എത്തിയപ്പോഴും ശ്രദ്ധ നേടിയിരുന്നു. ജയിലര്‍ ഒമര്‍ ലുലു സംവിധാനം ചെയ്തിരുന്നെങ്കില്‍ എങ്ങനെയായേനെ എന്നാണ് ഇപ്പോള്‍ സോഷ്യല്‍ മീഡിയയിലെ ചര്‍ച്ച.
മോഹന്‍ലാലിന്റെ മാസ് ഡയലോഗ് ഇങ്ങനെയായേനെ എന്ന് പറഞ്ഞു കൊണ്ടുള്ള ട്രോള്‍ ആണ് എത്തിയിരിക്കുന്നത്. മാത്യുവിന്റെ ഇന്‍ട്രോ സീനിലെ ഡയലോഗ് ‘അപ്പോ നീ പറഞ്ഞില്ലെങ്കില്‍.. ഞാന്‍ എന്താ നിന്നേം കൊണ്ട് ഗോവയില്‍ മസാജിങ്ങിന് പോവോ.. എന്താ ബഡി’ എന്നാക്കി മാറ്റിയിരിക്കുകയാണ് സോഷ്യല്‍ മീഡിയ.
രസകരമായ ക്യാപ്ഷനോടെ സംവിധായകന്‍ ഒമര്‍ ലുലു ഈ ട്രോള്‍ പങ്കുവച്ചിട്ടുണ്ട്. ‘എന്താ ബഡി.. ഇത് ഒരു വെഡ്ഡിങ്ങ് സോങ്ങ് കൂടി വേണ്ടേ എന്റെ പടത്തില്‍’ എന്നാണ് ഒമര്‍ കുറിച്ചത്. നിരവധി രസകരമായ കമന്റുകളും ഈ പോസ്റ്റിന് ലഭിക്കുന്നുണ്ട്.
അതേസമയം, ജയിലര്‍ റിലീസ് വേളയില്‍ ഒമര്‍ കുറിച്ച് വാക്കുകള്‍ ശ്രദ്ധനേടിയിരുന്നു. വിനായകന് പകരം മമ്മൂട്ടി വില്ലനായി വന്നിരുന്നുവെങ്കില്‍ പടത്തിന് ഒരു ഡബിള്‍ ഇമ്പാക്ട് കിട്ടിയേനെ അങ്ങനെയാണെങ്കില്‍ മിനിമം ഒരു 500 കോടി എങ്കിലും ബോക്സ് ഓഫീസ് കളക്ഷന്‍ വന്നേനെ എന്നായിരുന്നു ഒമര്‍ പറഞ്ഞത്.
എന്നാല്‍ ജയിലര്‍ 600 കോടി ബോക്സ് ഓഫീസില്‍ നിന്നും നേടിയിരുന്നു. മോഹന്‍ലാലിനൊപ്പം കന്നഡ സൂപ്പര്‍ താരം ശിവ രാജ്കുമാറിന്റെ മാസ് എന്‍ട്രിയും ശ്രദ്ധ നേടിയിരുന്നു. രമ്യ കൃഷ്ണന്‍, യോഗി ബാബു, മിര്‍ണ മേനോന്‍, വസന്ത് രവി, ജാക്കി ഷ്രോഫ്, സുനില്‍ എന്നിവരാണ് ചിത്രത്തില്‍ മറ്റ് പ്രധാന കഥാപാത്രങ്ങളായത്.