സൗബിന്‍ ഷാഹിര്‍ നായകനാകുന്ന ‘ഇലവീഴാപൂഞ്ചിറ’യുടെ ട്രെയിലര്‍ എത്തി. ഇലവീഴാപൂഞ്ചിറ എന്ന ഹൈറേഞ്ചില്‍ സുരക്ഷ ഉദ്യോഗസ്ഥരായ പൊലീസുകാരെക്കുറിച്ചാണ് സിനിമ. പൊലീസ് ഉദ്യോഗസ്ഥനായാണ് സൗബിന്‍ എത്തുന്നത്. ഒരു കൊലപാതകവും അതിന്റെ അന്വേഷണവുമാണ് ചിത്രത്തിന്റെ ഇതിവൃത്തമെന്നാണ് ട്രെയ്ലറില്‍ നിന്നും വ്യക്തമാകുന്നത്.
സുധി കോപ്പ, ജൂഡ് ആന്റണി എന്നിവരാണ് ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. പൊലീസ് ഉദ്യോഗസ്ഥരായ നിധീഷും ഷാജി മാറാടും ചേര്‍ന്നാണ് തിരക്കഥയൊരുക്കിയിരിക്കുന്നത്. ‘ജോസഫ്’, ‘നായാട്ട്’ എന്നി സിനിമകള്‍ക്ക് ശേഷം ഷാഹി കബീര്‍ സംവിധാനം ചെയ്യുന്ന ചിത്രമാണ് ഇലവീഴാപൂഞ്ചിറ. കപ്പേളയ്ക്ക് ശേഷം കഥാസ് അണ്‍ടോള്‍ഡിന്റെ ബാനറില്‍ വിഷ്ണു വേണു ആണ് നിര്‍മ്മാണം.
സമുദ്രനിരപ്പില്‍ നിന്നും മൂവായിരത്തിലധികം അടി ഉയരത്തില്‍ സ്ഥിതി ചെയ്യുന്ന പ്രദേശമാണ് വിനോദ സഞ്ചാര മേഖലയായ ‘ഇലവീഴാപൂഞ്ചിറ’. ഇവിടുത്തെ കാഴ്ചകള്‍ക്കൊപ്പം തന്നെ ശബ്ദത്തിനും ഏറെ പ്രാധാന്യം നല്‍കുന്നതാണ് ചിത്രം.
ഡോള്‍ബി വിഷന്‍ 4സ എച്ച്ഡിആറില്‍ മലയാളത്തില്‍ ഇറങ്ങുന്ന ആദ്യ സിനിമ എന്ന പ്രത്യേകതയും ഇലവീഴാപൂഞ്ചിറയ്ക്കുണ്ട്. ഛായാഗ്രഹണം- മനീഷ് മാധവന്‍, എഡിറ്റിംഗ് -കിരണ്‍ ദാസ്, സംഗീതം- അനില്‍ ജോണ്‍സണ്‍, കോസ്റ്റ്യൂം ഡിസൈന്‍ -സമീറ സനീഷ്.