ദളപതി വിജയ് നായകനായി എത്തുന്ന ബിഗില്‍ എന്ന ചിത്രത്തില്‍ വിജയ്‌ക്കൊപ്പം ഒരു നിര്‍ണായക വേഷം ചെയ്യുകയാണ് കേരളത്തിന്റെ കറുത്ത മുത്ത് ഐഎം വിജയന്‍. വിജയ്ക്ക് ഒപ്പമുള്ള ഷൂട്ടിങ് അനുഭവങ്ങള്‍ പങ്ക് വെക്കുകയാണ് വിജയന്‍. ആറ്റ്ലി ഒരുക്കുന്ന വിജയ് ചിത്രത്തിലേക്ക് ക്ഷണം വന്നപ്പോള്‍ തന്നെ ആവേശഭരിതനായി താനെന്നും ഫുട്ബോള്‍ കളിയുടെ പശ്ചാത്തലത്തില്‍ പറയുന്ന കഥ കൂടി ആയപ്പോള്‍ ആവേശം ഇരട്ടി ആയെന്നും അദ്ദേഹം പറയുന്നു.
കടുത്ത ഒരു വിജയ് ആരാധകന്‍ ആണ് താനെന്നും വിജയ് എന്ന കലാകാരന്റെ മഹത്വം അദ്ദേഹം പുലര്‍ത്തുന്ന എളിമ ആണെന്നും വിജയന്‍ പറയുന്നു. ആക്ഷന്‍ രംഗങ്ങളിലെ അദ്ദേഹത്തിന്റെ പ്രകടനം കാണുമ്പോള്‍ സ്‌റ്റൈല്‍ മന്നന്‍ എന്നു തന്നെ അദ്ദേഹത്തെ വിളിക്കാന്‍ തോന്നും എന്നും ഐ എം വിജയന്‍ പറഞ്ഞു. ആദ്യമായി അദ്ദേഹത്തിന്റെ മുന്നില്‍ എത്തിയപ്പോള്‍ താന്‍ അക്ഷരാര്‍ത്ഥത്തില്‍ വിറക്കുകയായിരുന്നു എന്നും എന്നാല്‍ അദ്ദേഹം ഇങ്ങോട്ട് വന്നു തനിക്കു ഹസ്തദാനം തന്നു കൊണ്ട്, ഈ ചിത്രത്തില്‍ അഭിനയിക്കാന്‍ സമ്മതിച്ചതിനു തന്നോട് നന്ദി പറയുകയാണ് ഉണ്ടായത് എന്നും ഐ എം വിജയന്‍ പറഞ്ഞു.
വിജയ് – അറ്റ്‌ലീ ഭാഗ്യ കൂട്ടുകെട്ടിലെ ആദ്യ രണ്ടു ചിത്രങ്ങളും ബ്ലോക്ബസ്റ്റര്‍ ഹിറ്റുകളായിരുന്നു. മെര്‍സല്‍ 200 കോടി നേടിയിരുന്നു, ബിഗിലിന് വലിയ പ്രതീക്ഷയാണ് ആരാധകര്‍ നല്‍കുന്നത്. സര്‍ക്കാരിന് ശേഷമാണ് വിജയുടെ പുതിയ സിനിമ ബിഗില്‍ എത്തുന്നത്. എജിഎസ് എന്റര്‍ടെയ്ന്‍മെന്റ്‌സാണ് വിജയ് ചിത്രം നിര്‍മ്മിക്കുന്നത്.
ലേഡീ സൂപ്പര്‍സ്റ്റാര്‍ നയന്‍താര നായികാ വേഷത്തില്‍ എത്തുന്ന ചിത്രത്തില്‍ യോഗി ബാബു, ഡാനിയേല്‍ ബാലാജി, റെബ മോണിക്ക ജോണ്‍, വിവേക്, കതിര്‍, ജാക്കി ഷ്‌റോഫ് തുടങ്ങിയവരും അഭിനയിക്കുന്നു. ഈ ചിത്രം നിലവിലെ തമിഴ്നാട് – കേരള ഫസ്റ്റ് ഡേ കളക്ഷന്‍ തകര്‍ക്കുമെന്നും 300 കോടിയിലധികം ഫൈനല്‍ കളക്ഷന്‍ നേടുമെന്നും ബോക്സ് ഓഫീസ് അനലിസ്റ്റുകള്‍ വിലയിരുത്തുന്നു.