തന്റെ പുതിയ ചിത്രം താക്കോലിന്റെ റിലീസ് തീയതി പുറത്തുവിട്ട് നടന്‍ ഇന്ദ്രജിത്ത്. ഡിസംബര്‍ 6ന് തീയേറ്ററുകളിലെത്തുന്ന താക്കോലും അതിലെ കഥാപാത്രവുമാണ് തന്റെ ഹൃദയത്തോട് ഏറ്റവും അടുത്തുനില്‍ക്കുന്നതെന്നും ഇന്ദ്രജിത്ത് ഫെയ്‌സ്ബുക്കില്‍ കുറിച്ചു.
ക്രൈസ്തവ പശ്ചാത്തലത്തിലൊരുങ്ങുന്ന ചിത്രത്തില്‍ ഇന്ദ്രജിത്തും മുരളി ഗോപിയുമാണ് പ്രധാന വേഷങ്ങളിലെത്തുന്നത്. ശ്യാമപ്രസാദ് സംവിധാനം ചെയ്ത ഇലക്ട്ര എന്ന സിനിമയിലൂടെ ശ്രദ്ധ നേടിയ കിരണ്‍ പ്രഭാകരനാണ് ഈ ചിത്രത്തിന്റെ സംവിധായകന്‍. ഷാജി കൈലാസാണ് ചിത്രം നിര്‍മ്മിക്കുന്നത്.
ചിത്രത്തില്‍ ഫാദര്‍ ആംബ്രോസ് ഓച്ചമ്പളി എന്ന കഥാപാത്രമായി ഇന്ദ്രജിത്തും ഫാദര്‍ മാങ്കുന്നത്ത് പൈലിയായി മുരളിഗോപിയും എത്തുന്നു. ലെഫ്റ്റ് റൈറ്റ് ലെഫ്റ്റ്, കാഞ്ചി, ഈ അടുത്ത കാലത്ത്, ടിയാന്‍ എന്നിവയാണ് ഇന്ദ്രജിത്തും മുരളി ഗോപിയും ഇതിനുമുമ്പ് ഒന്നിച്ചഭിനയിച്ച ചിത്രങ്ങള്‍. ഇനിയയാണ് ചിത്രത്തിലെ നായിക. സുധീര്‍ കരമന, നെടുമുടി വേണു, മീര വാസുദേവ് തുടങ്ങിയവരും ചിത്രത്തിലെ മറ്റു പ്രധാന കഥാപാത്രങ്ങളായി എത്തുന്നത്.
റസൂല്‍ പൂക്കുട്ടിയാണ് ചിത്രത്തിന്റെ സൗണ്ട് ഡിസൈന്‍. എം ജയചന്ദ്രനാണ് സംഗീത സംവിധായകന്‍.