സംസ്ഥാനത്ത് കോവിഡ് വ്യാപനം കുറഞ്ഞാല്‍ മാത്രമേ സിനിമാ തിയേറ്ററുകള്‍ തുറക്കാന്‍ സാധിക്കുകയുള്ളുവെന്ന് മന്ത്രി സജി ചെറിയാന്‍. സിനിമകള്‍ക്ക് വിനോദ നികുതി ഒഴിവാക്കുന്നതില്‍ പ്രായോഗികമായ ബുദ്ധിമുട്ടുണ്ട്. സര്‍ക്കാര്‍ നിയന്ത്രണത്തിലുളള ഒ.ടി.ടി പ്ലാറ്റ്ഫോകളിലൂടെ സിനിമകള്‍ പ്രദര്‍ശിപ്പിക്കുന്നതിനുളള നടപടികള്‍ പുരോഗമിക്കുന്നുണ്ടെന്നും മന്ത്രി അറിയിച്ചു.
തിയേറ്ററുകള്‍ പ്രവര്‍ത്തനം ആരംഭിക്കുമെന്ന പ്രതീക്ഷയില്‍ നിലവില്‍ രണ്ട് സിനിമകളുടെ തിയേറ്റര്‍ റിലീസ് തീയതിയാണ് പ്രഖ്യാപിച്ചിട്ടുള്ളത്. മോഹന്‍ലാലിന്റെ ബ്രഹ്മാണ്ഡ സിനിമകളായ “മരക്കാര്‍ അറബിക്കടലിന്റെ സിംഹം”, “ആറാട്ട്” എന്നീ രണ്ട് ചിത്രങ്ങളുടെ റിലീസ് തീയതിയാണ് കഴിഞ്ഞ ദിവസങ്ങളില്‍ പുറത്തുവിട്ടത്.
ഓഗസ്റ്റ് 12ന് ആണ് മരക്കാര്‍ റിലീസിന് എത്തുക. ദേശീയ , സംസ്ഥാന പുരസ്‌കാരങ്ങള്‍ നേടിയ മരക്കാറിനായി ഏറെ ആവേശത്തോടെയാണ് സിനിമാപ്രേമികള്‍ കാത്തിരിക്കുന്നത്. പ്രിയദര്‍ശന്‍ സംവിധാനം ചെയ്ത ചിത്രത്തില്‍ മോഹന്‍ലാലിന് ഒപ്പം വന്‍ താരനിരയാണ് അണിനിരക്കുന്നത്.
ബി. ഉണ്ണികൃഷ്ണന്‍ സംവിധാനം ചെയ്യുന്ന ആറാട്ട് ഒക്ടോബര്‍ 14ന് ആണ് തിയേറ്ററുകളില്‍ റിലീസിന് എത്തുന്നത്. ഉദയ കൃഷ്ണയാണ് തിരക്കഥ ഒരുക്കുന്ന ചിത്രം മാസ് മസാല പടമായാണ് എത്തുന്നത്. ശ്രദ്ധ ശ്രീനാഥ് ആണ് നായിക. നെയ്യാറ്റിന്‍കര ഗോപന്റെ ആറാട്ട് എന്നാണ് ചിത്രത്തിന്റെ മുഴുവന്‍ പേര്.
