നടൻ മിക്കി റൂർക്കിനെതിരെ ഗുരുതര ആരോപണവുമായി രംഗത്തെത്തിയിരിക്കുകയാണ് നടി ബെല്ല തോൺ. ‘ഗേൾ’ എന്ന സിനിമയുടെ ചിത്രീകരണത്തിനിടെ മിക്കി റൂർക്ക് തന്നെ ഉപദ്രവിച്ചെന്നാണ് ബെല്ല തോണിന്റെ വെളിപ്പെടുത്തൽ. തന്റെ ജനനേന്ദ്രിയത്തിൽ ലോഹവസ്തുകൊണ്ട് പരിക്കേൽപ്പിച്ചുവെന്നാണ് ബെല്ല പറയുന്നത്. അമേരിക്കൻ ഗായികയായ ജോജോ സിവയ്ക്കെതിരെ കഴിഞ്ഞദിവസം മിക്കി റൂർക്ക് അധിക്ഷേപകരമായ പരാമർശങ്ങൾ നടത്തിയിരുന്നു. പിന്നാലെ ഇതിനെതിരെയുള്ള പ്രതികരണമായാണ് നടനിൽ നിന്നും തനിക്ക് നേരിടേണ്ടി വന്ന ദുരനുഭവത്തേക്കുറിച്ച് നടി വെളിപ്പെടുത്തിയത്.
തന്റെ ഇൻസ്റ്റാഗ്രാം സ്റ്റോറിയിലൂടെയായിരുന്നു നടിയുടെ വെളിപ്പെടുത്തൽ. നടിയെന്ന നിലയിൽ ജീവിതത്തിലുണ്ടായ ഏറ്റവും മോശം അനുഭവങ്ങളിലൊന്നായിരുന്നു മിക്കി റൂർക്കിനൊപ്പം പ്രവർത്തിച്ചപ്പോഴുണ്ടായതെന്നും നടി വെളിപ്പെടുത്തി. ഗേൾ എന്ന ചിത്രത്തിൽ മിക്കിയും ബെല്ലയും ഒരുമിച്ചുള്ള രംഗമായിരുന്നു ചിത്രീകരിക്കുന്നത്. മുട്ടിൽ നിൽക്കുന്ന ബെല്ലയുടെ കഥാപാത്രത്തിന്റെ കാൽമുട്ടിൽ ലോഹവസ്തു പ്രയോഗിക്കുന്ന രംഗത്തിലാണ് മിക്കി ഉപദ്രവിച്ചതെന്ന് ബെല്ല കുറിച്ചു.
താരത്തിന്റെ വെളിപ്പെടുത്തൽ ഇങ്ങനെ “എനിക്ക് ഈ മനുഷ്യനൊപ്പം ജൊലി ചെയ്യേണ്ടിവന്നു. ഞാൻ, കൈകൾ പിന്നിലേക്ക് ബന്ധിക്കപ്പെട്ട് മുട്ടിൽ നിൽക്കുന്ന രംഗമായിരുന്നു ചിത്രീകരിക്കേണ്ടിയിരുന്നത്. എൻ്റെ കാൽമുട്ടിൽ ലോഹ ഗ്രൈൻഡർ പ്രയോ ഗിക്കുകയായിരുന്നു ആ സീനിൽ ചെയ്യേണ്ടിയിരുന്നത്. എന്നാൽ അയാൾ ജീൻസിന് പുറത്തുകൂടി ആ വസ്‌തു എൻ്റെ ജനനേന്ദ്രിയത്തിൽ തുടരെ പ്രയോഗിച്ചു. ഇക്കാരണത്താൽ പെൽവിക് അസ്ഥിയിൽ ചതവുകൾ ഉണ്ടായി. മിക്കി റൂർക്ക് കാർ ഉപയോഗിച്ച് തൻ്റെ ദേഹത്ത് മുഴുവൻ അഴുക്കാക്കിയ സംഭവവും ഉണ്ടായിട്ടുണ്ടെന്നും ബെല്ല കുറിച്ചു.