1986ല്‍ പുറത്തിറങ്ങിയ ചിത്രമാണ് “സന്മനസ്സുള്ളവര്‍ക്ക് സമാധാനം”. സത്യന്‍ അന്തിക്കാട് സംവിധാനം ചെയ്ത ചിത്രത്തില്‍ മോഹന്‍ലാല്‍, ശ്രീനിവാസന്‍, കാര്‍ത്തിക എന്നിവരാണ് കേന്ദ്ര കഥാപാത്രങ്ങളായത്. ഹിറ്റായി മാറിയ ചിത്രത്തിലെ ഗാനങ്ങളും പ്രേക്ഷകര്‍ ആസ്വദിച്ചിരുന്നു.
ഇന്‍സ്‌പെക്ടര്‍ രാജേന്ദ്രന്‍ ആയി വേഷമിട്ട ശ്രീനിവാസന്‍ മീരയായി വേഷമിട്ട കാര്‍ത്തികയോട് പ്രണയാഭ്യര്‍ത്ഥ നടത്തുന്ന രംഗത്തിലെ “പവിഴമല്ലി പൂത്തുലഞ്ഞ നീലവാനം” എന്ന ഗാനം ഏറെ ഹിറ്റാണ്. ഈ ഗാനത്തിന്റെ ഷൂട്ടിംഗ് സമയത്തുണ്ടായ രസകരമായ സംഭവങ്ങള്‍ പങ്കുവയ്ക്കുകയാണ് രവി മേനോന്‍.
എറണാകുളം സുഭാഷ് പാര്‍ക്കില്‍ വച്ചാണ് ഈ ഗാനരംഗം ചിത്രീകരിച്ചത്. പ്രേംനസീറിന്റെ കാമുക കഥാപാത്രങ്ങളെ അനുസ്മരിപ്പിക്കുന്ന തരത്തില്‍ ശ്രീനിവാസനെ അവതരിപ്പിക്കാനായിരുന്നു സത്യന്‍ അന്തിക്കാടിന്റെ ഉദ്ദേശ്യം. നസീര്‍ ഇടുന്ന പോലത്തെ ജുബ്ബ തന്നെ ശ്രീനിക്ക് വേണ്ടി സംഘടിപ്പിച്ചിരുന്നു.
എന്നാല്‍ ശ്രീനി ജുബ്ബ ഇട്ടു നോക്കിയപ്പോള്‍ ഉള്ളതിലും കുറവ് ഉയരം തോന്നിച്ചു. അത് അഭംഗിയാവുമെന്ന് തോന്നിയപ്പോഴാണ് വേഷം ഇറുകിപ്പിടിച്ച ഷര്‍ട്ടിലേക്കും പാന്റ്സിലേക്കും മാറ്റുന്നിയത്. പൊലീസ് ഇന്‍സ്പെക്ടറുടെ മസില്‍ പിടിച്ചുള്ള നടത്തവും ആംഗ്യ വിക്ഷേപങ്ങളും കൂടി ചേര്‍ന്നപ്പോള്‍ സംഭവം വലിയ ഹിറ്റായി മാറിയെന്ന് രവി മേനോന്‍ ഗൃഹലക്ഷ്മിയില്‍ പറഞ്ഞു.