പോസ്റ്ററുകളിലെ വ്യത്യസ്ത ലുക്കുകള്‍ കൊണ്ട് ചര്‍ച്ചയാവുകയാണ് മോഹന്‍ലാല്‍ നായകനായെത്തുന്ന പുതിയ ചിത്രം ഇട്ടിമാണി.മോഹന്‍ലാലിന്റെ മാര്‍ഗ്ഗംകളി വേഷത്തിലുള്ള ആദ്യ പോസ്റ്ററിന് സോഷ്യല്‍ മീഡിയയില്‍ മികച്ച പ്രതികരണമാണ് ലഭിച്ചത്. ഇപ്പോഴിതാ വിന്റേജ് ലുക്കില്‍ ഒരു കൈയില്‍ തോക്കും മറുകൈയില്‍ കോഴിയെയുമായി നടന്നു വരുന്ന ഒരു വേട്ടക്കാരന്‍ ലുക്കാണ് പുറത്തു വിട്ടിരിക്കുന്നത്.
ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മ്മിക്കുന്ന ഈ ചിത്രം മോഹന്‍ലാലിന്റെ ഈ വര്‍ഷത്തെ രണ്ടാമത്തെ മലയാളം റിലീസ് ആയി ഓണത്തിന് എത്തിക്കാന്‍ ആണ് പ്ലാന്‍.
പോസ്റ്ററിലെ ക്യാപ്ഷനും ആരാധകര്‍ ഏറ്റെടുത്തു കഴിഞ്ഞു. ഇട്ടിമാണി മാസുമാണ് മനസ്സുമാണ് എന്നാണ് ആ പോസ്റ്റര്‍ ക്യാപ്ഷന്‍ പറയുന്നത്. ഷാജി കുമാര്‍ ഛായാഗ്രഹണം നിര്‍വഹിക്കുന്ന ഈ ചിത്രത്തിന് സംഗീതം ഒരുക്കുന്നത് ടീം ഫോര്‍ മ്യൂസിക്‌സ് ആണ്. മോഹന്‍ലാലിന് ഒപ്പം അജു വര്‍ഗീസ്, ഹരിഷ് കണാരന്‍, ധര്‍മജന്‍ ബോള്‍ഗാട്ടി, രാധിക ശരത് കുമാര്‍, ഹണി റോസ്, അശോകന്‍, സിജോയ് വര്‍ഗീസ്, കൈലാഷ്, കെ പി എ സി ലളിത, വിനു മോഹന്‍, സ്വാസിക, വിവിയ, സിദ്ദിഖ്, സലിം കുമാര്‍, അരിസ്റ്റോ സുരേഷ്, ജോണി ആന്റണി തുടങ്ങി ഒരു വമ്പന്‍ താര നിര ആണ് ഈ ചിത്രത്തില്‍ അണിനിരക്കുന്നത്. മോഹന്‍ലാലിന്റെ ഈ വര്‍ഷത്തെ ആദ്യ ചിത്രമായി എത്തിയ ലൂസിഫര്‍ മലയാള സിനിമയിലെ എക്കാലത്തെയും വലിയ വിജയം ആയി മാറിയിരുന്നു.