മലയാള ചലച്ചിത്രരംഗത്തെ സമഗ്ര സംഭാവനയ്ക്കുള്ള 2021ലെ ജെ സി ഡാനിയേൽ പുരസ്കാരം മുതിർന്ന സംവിധായകൻ കെ പി കുമാരന്. സാംസ്കാരിക മന്ത്രി വി.എൻ. വാസവനാണ് അവാർഡ് പ്രഖ്യാപിച്ചത്. ഗായകൻ പി ജയചന്ദ്രൻ ചെയർമാനായ ജൂറിയാണ് കെ പി കുമാരനെ പുരസ്‍കാരത്തിനായി തിരഞ്ഞെടുത്തത്. സംസ്ഥാന സർക്കാറിൻറെ പരമോന്നത ചലച്ചിത്ര പുരസ്കാരമാണ് ജെ സി ഡാനിയേൽ അവാർഡ്.
അഞ്ചു ലക്ഷം രൂപയും പ്രശസ്തിപത്രവും ശിൽപവും അടങ്ങുന്ന ജെ.സി. ഡാനിയേൽ പുരസ്കാരം ഓഗസ്റ്റ് 3ന് തിരുവനന്തപുരത്ത് നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ സമ്മാനിക്കും. അടൂർ ഗോപാലകൃഷ്ണൻറെ അരങ്ങേറ്റ ചിത്രം സ്വയംവരത്തിൻറെ സഹരചയിതാവായി സിനിമാരംഗത്തേക്ക് എത്തിയ കെ പി കുമാരൻ പത്തോളം ശ്രദ്ധേയ ചിത്രങ്ങളുടെ സംവിധായകനാണ്.
1938ൽ തലശ്ശേരിയിൽ ജനിച്ച അദ്ദേഹം സിനിമയിൽ എത്തുന്നതിനു മുൻപേ പരീക്ഷണാത്മക നാടന പ്രസ്ഥാനങ്ങളുമായി സഹകരിച്ചിട്ടുണ്ട്. സി ജെ തോമസിൻറെ നാടകങ്ങളിൽ അഭിനയിക്കുകയും ചെയ്തു. പിന്നീടാണ് സ്വയംവരത്തിൻറെ സഹ തിരക്കഥാകൃത്തായി എത്തുന്നത്. മൂന്നു വർഷത്തിനു ശേഷം 1975ൽ അതിഥി എന്ന ചിത്രമൊരുക്കി സംവിധായകനായി അരങ്ങേറ്റം കുറിച്ചു.
തോറ്റം, രുഗ്‍മിണി, നേരം പുലരുമ്പോൾ, ആദിപാപം, തേൻതുള്ളി, കാട്ടിലെ പാട്ട്, തേൻതുള്ളി, ആകാശഗോപുരം, ഈ വർഷം പുറത്തെത്തിയ ഗ്രാമവൃക്ഷത്തിലെ കുയിൽ എന്നിവയാണ് പ്രധാന ചിത്രങ്ങൾ. കുമാരനാശാൻറെ ജീവിതം പകർത്തിയ ചിത്രമായിരുന്നു ഇത്. ജെ സി ഡാനിയേൽ പുരസ്കാരം വലിയ സന്തോഷവും ആശ്വാസവുമാണെന്നാണ് കെ പി കുമാരൻ പ്രതികരിച്ചു. പുരസ്കാരം കുമാരനാശാന് സമർപ്പിക്കുന്നുവെന്നും അദ്ദേഹം കൂട്ടിച്ചേർത്തു