നയൻതാര അഭിനയിച്ച കൊലമാവ് കോകിലയുടെ ഹിന്ദി റീമേക്ക് ഗുഡ്‌ലക്ക് ജെറിയുടെ ട്രെയ്‌ലർ റിലീസ് ചെയ്തു. ജാൻവി കപൂര്റാണ് ചിത്രത്തിൽ പ്രധാന വേഷത്തിലെത്തുന്നത്. ഡിസ്‌നി പ്ലസ് ഹോട്ട്സ്റ്റാറിലൂടെയാണ് ചിത്രം റിലീസ് ചെയ്യുന്നത്.. അഗ്‌നിപത്, ഓയ്‌ലക്കി ലക്കി ഓയ് തുടങ്ങിയ സിനിമകളുടെ സഹസംവിധായകൻ ആയിരുന്ന സിദ്ധാർഥ് സെൻഗുപ്തയാണ് ചിത്രം സംവിധാനം ചെയ്യുന്നത്.
ജയകുമാരി-ജെറി എന്നാണ് ജാൻവി അവതരിപ്പിക്കുന്ന കഥാപാത്രത്തിന്റെ പേര്. അമ്മയുടെ ചികിത്സയ്ക്കായി പണം ആവശ്യമായി വരുമ്പോൾ ജെറിയും കുടുംബവും ചേർന്ന് മയക്കുമരുന്ന് കടത്തുവാൻ തുടങ്ങുന്നതും പിന്നീടുള്ള രസകരമായ സംഭവവികസങ്ങളുമാണ് സിനിമയുടെ ഇതിവൃത്തം.
ബ്ലാക്ക് ഹ്യൂമർ വിഭാഗത്തിലുള്ള ചിത്രമാണ് ഗുഡ് ലക്ക് ജെറി. ഈ മാസം 29നാണ് ചിത്രം റിലീസ് ചെയ്യുക. നെൽസൺ ദിലീപാണ് തമിഴ് ചിത്രം കൊലമാവ് കോകില സംവിധാനം ചെയ്തത്.
ആനന്ദ് എൽ റായ് ആണ് ചിത്രം നിർമിച്ചിരിക്കുന്നത്. പങ്കജ് മേത്തയുടേതാണ് തിരക്കഥ. ദീപക് ഡോബിയാൽ, നീരജ് സൂദ്, മിത വസിഷ്ത് എന്നിവരും സിനിമയിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. അതേസമയം മിലിയാണ് ജാൻവിയുടേതായി അണിയറയിൽ ഒരുങ്ങുന്ന മറ്റൊരു ചിത്രം.