വന്‍ പ്രതീക്ഷയോടെ ബോക്‌സ് ഓഫീസിലേക്ക് എത്തിയ ‘ജവാന്‍’ സിനിമയുടെ എച്ച് ഡി പതിപ്പ് ചോര്‍ന്നു. സിനിമയുടെ എച്ച്ഡി പതിവ് വിവിധ സൈറ്റുകളിലും ടെലഗ്രാമിലും എത്തിയിട്ടുണ്ട്. ഷാരൂഖ് ഖാന്‍ ചിത്രം ജവാന്റെ കളക്ഷനെ ഇത് എങ്ങനെ ബാധിക്കുമെന്ന ആശങ്കയിലാണ് നിര്‍മാതാക്കള്‍. വ്യാജ റിവ്യുകള്‍ക്ക് എതിരെ ജവാന്‍ സിനിമയുടെ നിര്‍മാതാക്കള്‍ നേരത്തെ രംഗത്ത് എത്തിയിരുന്നു. സിനിമയുടെ എച്ച്ഡി പ്രിന്റ് ചോര്‍ന്നത് തമിഴ്‌നാട്ടില്‍ നിന്നാണെന്നാണ് പുറത്തുവരുന്ന റിപ്പോര്‍ട്ടുകള്‍ വ്യക്തമാക്കുന്നത്.
പഠാന്റെ വന്‍ വിജയത്തിനു ശേഷമുള്ള ചിത്രം എന്നതിനാല്‍ ഷാരൂഖ് ഖാനും ആരാധകര്‍ക്കും വലിയ പ്രതീക്ഷയായിരുന്നു ചിത്രത്തെക്കുറിച്ച് ഉള്ളത്. ഹിറ്റ്‌മേക്കര്‍ അറ്റ്‌ലിയാണ് ഷാരൂഖിന്റെ ജവാന്‍ സംവിധാനം ചെയ്തിരിക്കുന്നത്. അറ്റിലിയുടെ മാസ്റ്റര്‍പീസാണ് ചിത്രമെന്നാണ് അഭിപ്രായങ്ങള്‍. ഷാരൂഖ് ഖാന്‍ നിറഞ്ഞുനില്‍ക്കുന്നു ജവാനിലെന്നുമായിരുന്നു ആദ്യ പ്രതികരണങ്ങള്‍. ഷാരൂഖ് ഖാനും നയന്‍താരയും ആക്ഷന്‍ രംഗങ്ങളില്‍ മികച്ച പ്രകടനമാണ് നടത്തിയിരിക്കുന്നത് എന്നും റിപ്പോര്‍ട്ടുകളുണ്ട്.
ഇതാദ്യമായിട്ടാണ് അറ്റ്‌ലിയുടെ സംവിധാനത്തില്‍ ഒരു ചിത്രത്തില്‍ ഷാരൂഖ് ഖാന്‍ നായകനാകുന്നത്. അറ്റ്‌ലിയും ഷാരൂഖ് ഖാനും ഒന്നിക്കുന്ന ചിത്രമായതിനാല്‍ ജവന്‍ വന്‍ ഹിറ്റാകും എന്നാണ് പ്രേക്ഷകര്‍ പ്രതീക്ഷിച്ചിരുന്നത്. എന്നാല്‍ സിനിമ എല്ലാത്തരം പ്രേക്ഷകര്‍ക്കും അത്ര ഇഷ്ടപ്പെടുന്നില്ല എന്നും പ്രതികരണങ്ങളില്‍ നിന്നും വ്യക്തമാകുന്നു. തമിള്‍ റോക്കോഴ്‌സ് അടക്കമുള്ളവരാണ് സിനിമയുടെ എച്ച് ഡി പതിപ്പ് ചോര്‍ത്തിയതെന്നും ആരോപണം ഉയര്‍ന്നിട്ടുണ്ട്.