ബോളിവുഡിന്റെ കിങ് ഖാന്റെ ‘ജവാന്‍’ തിയേറ്റര്‍ കീഴടക്കുമ്പോള്‍ ഇപ്പോള്‍ തരംഗമാകുന്നത് റിധി ദോഗ്രയാണ്. ഷാരൂഖിനും നയന്‍ താരയ്ക്കും ഒക്കെ പിന്നാലെ റിധിയുടെ കാവേരി അമ്മയാണ് ഇപ്പോള്‍ സോഷ്യല്‍ മീഡിയയിലെ സംസാര വിഷയം. തമിഴ് സംവിധായകന്‍ അറ്റ്‌ലിയുടെ ആദ്യ ബോളിവുഡ് ചിത്രം ബോക്‌സോഫീസില്‍ കുതിച്ചു പായുമ്പോള്‍ സോഷ്യല്‍ മീഡിയയില്‍ കാവേരി അമ്മ ചര്‍ച്ച പൊടിപൊടിക്കുകയാണ്.
ഹിന്ദി ടെലിവിഷന്‍ സ്‌ക്രീനില്‍ തിളങ്ങി നില്‍ക്കുന്ന റിധി ദോഗ്രയാണ് ഷാരൂഖിന്റെ വളര്‍ത്തമ്മയായി ചിത്രത്തിലുള്ളത്. താരത്തിന്റെ പ്രായവും ഷാരൂഖിന്റെ പ്രായക്കൂടുതലുമെല്ലാം സോഷ്യല്‍ മീഡിയയില്‍ ചര്‍ച്ചയാവുന്നതിനൊപ്പം കാവേരി അമ്മ എന്ന ക്യാരക്ടര്‍ പേരും ചര്‍ച്ചയാവുന്നുണ്ട്.
നിരൂപക പ്രശംസയടക്കം നേടിയ ‘സ്വദേശ്’ എന്ന ഷാരൂഖിന്റെ കരിയറിലെ തന്നെ മികച്ച ചിത്രങ്ങളിലൊന്നായി വിലയിരുത്തപ്പെടുന്ന ചിത്രത്തിലെ ‘കാവേരി അമ്മ’ ക്യാരക്ടര്‍ ജവാനിലെത്തിയതാണ് ആരാധകരെ ആവേശത്തിലാക്കിയത്. സ്വദേശില്‍ ശാസ്ത്രജ്ഞനായ ഷാരൂഖിന്റെ ക്യാരക്ടര്‍ മോഹന്‍ ഭാര്‍ഗവിന്റെ ജീവിതത്തിലെ നിര്‍ണായക സ്വാധീനമായ അമ്മയായിരുന്നു കാവേരി അമ്മ.
മികച്ച അഭിനേത്രിയായിരുന്ന കിശോരി ബല്ലാല്‍ ആയിരുന്നു 2004 പുറത്തിറങ്ങിയ സ്വദേശില്‍ കാവേരി അമ്മ കഥാപാത്രം ചെയ്തത്. ജവാനില്‍ സ്വദേശിനെ ഓര്‍മ്മിപ്പിച്ചു കൊണ്ട് കാവേരി അമ്മ പരാമര്‍ശങ്ങള്‍ വന്നത് ഷാരൂഖ് ആരാധകരെ നൊസ്റ്റാള്‍ജിക് ആക്കിയെന്ന് പറയണം. സേഷ്യല്‍ മീഡിയയില്‍ കാവേരി അമ്മ ചര്‍ച്ച കള്‍ പൊടി പൊടിക്കുകയാണ്.
ഒപ്പം റിധി ദോഗ്രയുടെ സ്‌റ്റൈലും ക്യൂട്ട്‌നെസും ഇന്റര്‍നെറ്റില്‍ ചര്‍ച്ചയാകുമ്പോള്‍ താരവും ആരാധകര്‍ക്ക് മറുപടി നല്‍കുന്നുണ്ട്.
‘വാട്ട് എ ക്യൂട്ട് കാവേരി അമ്മ’ എന്നതാണ് ഇപ്പോള്‍ ട്രെന്‍ഡാവുന്ന സോഷ്യല്‍ മീഡിയ ചര്‍ച്ചകളില്‍ ഒന്ന്.