മുന്‍ മുഖ്യമന്ത്രി ജയലളിതയുടെ ബയോപിക് സിനിമകള്‍ ഒരുക്കുന്ന സംവിധായകര്‍ക്ക് മദ്രാസ് ഹൈക്കോടതിയുടെ നോട്ടീസ്. ജയലളിതയുടെ ജീവിത കഥയായി ഒരുങ്ങുന്ന രണ്ട് പ്രൊജക്ടുകളും സ്റ്റേ ചെയ്യണമെന്ന് ആവശ്യപ്പെട്ട് ജയലളിതയുടെ മരുമകള്‍ ദീപ ജയകുമാര്‍ സമര്‍പ്പിച്ച ഹര്‍ജിയിലാണ് സംവിധായകര്‍ എ എല്‍ വിജയ്ക്കും ഗൗതം വാസുദേവ് മേനോനും നോട്ടീസ് അയച്ചിരിക്കുന്നത്.
രണ്ട് സംവിധായകരും ബയോപിക് സിനിമ ഒരുക്കാന്‍ തന്നോട് അനുമതി വാങ്ങിയിട്ടില്ലെന്നും ചിത്രം കുടുംബ സ്വകാര്യത തകര്‍ക്കുമെന്നും ദീപ ഹര്‍ജിയില്‍ ഉന്നയിക്കുന്നുണ്ട്. ജസ്റ്റിസ് കല്യാണസുന്ദരമാണ് വാദം കേട്ട് നവംബര്‍ 14-ന് ഹാജരാകാനായി സംവിധായകര്‍ക്ക് നോട്ടീസ് അയച്ചിരിക്കുന്നത്.
ബോളിവുഡ് സുന്ദരി കങ്കണ റണാവത്തിനെ കേന്ദ്ര കഥാപാത്രമാക്കിയാണ് എ എല്‍ വിജയ് “തലൈവി” ഒരുക്കുന്നത്. “ക്വീന്‍” എന്ന വെബ് സീരിസാണ് ഗൗതം മേനോന്‍ ഒരുക്കുന്നത്. കഴിഞ്ഞ മാസമാണ് ദീപ ഹൈക്കോടതിയില്‍ ഹര്‍ജി സമര്‍പ്പിച്ചത്.