ഭാര്യക്കും മക്കള്‍ക്കുമൊപ്പമുള്ള ചിത്രങ്ങള്‍ സോഷ്യല്‍ മീഡിയ അക്കൗണ്ടുകളില്‍ നിന്നും ഡിലീറ്റ് ചെയ്ത് ജയം രവി. ഭാര്യ ആര്‍തിയില്‍ നിന്നും സോഷ്യല്‍ മീഡിയ അക്കൗണ്ടുകളുടെ ആക്‌സസ് വീണ്ടെടുത്ത ശേഷമാണ് ജയം രവിയുടെ നീക്കം. ഭാര്യ ആര്‍തിയായിരുന്നു നടന്റെ സോഷ്യല്‍ മീഡിയ അക്കൗണ്ടുകള്‍ കൈകാര്യം ചെയ്തിരുന്നത്.
ഈ മാസം ആദ്യമാണ് താനും ഭാര്യ ആര്‍തിയും വേര്‍പിരിയുന്നുവെന്ന് ജയം രവി പ്രഖ്യാപിച്ചത്. 15 വര്‍ഷത്തെ ദാമ്പത്യത്തിന് ശേഷമാണ് രവിയും ആരതിയും വിവാഹമോചനത്തിലേക്ക് നീങ്ങുന്നത്. എന്നാല്‍ ആര്‍തി വിവാഹ മോചനത്തിന് തയ്യാറല്ല എന്നാണ് വിവരം. വിവാഹമോചനം പ്രഖ്യാപിച്ചതിന് പിന്നാലെ ആര്‍തി കുറിപ്പുമായി രംഗത്തെത്തിയിരുന്നു.
തന്റെ അറിവോ സമ്മതമോ കൂടാതെയാണ് ജയം രവി വിവാഹമോചനം പ്രഖ്യാപിച്ചത് എന്നായിരുന്നു ആര്‍തി പറഞ്ഞത്. ജയം രവിയുടെ തീരുമാനം ഏകപക്ഷീയമാണെന്നും പ്രഖ്യാപനത്തില്‍ താന്‍ ഞെട്ടിയെന്നും താനും മക്കളും നടനെ കാണാന്‍ ശ്രമിച്ചെങ്കിലും അതിന് സാധിച്ചില്ലെന്നും ആര്‍തി വ്യക്തമാക്കി.
അതേസമയം, വൈകാതെ തന്നെ കുട്ടികളുടെ കസ്റ്റഡിയ്ക്കായി നിമയപോരാട്ടത്തിന് ഇറങ്ങുമെന്ന് ജയം രവി മാധ്യമങ്ങളോട് വ്യക്തമാക്കിയിട്ടുണ്ട്. പത്തല്ല, ഇരുപത് വര്‍ഷം എടുത്തിട്ടാണെങ്കിലും മക്കളുടെ കസ്റ്റഡി നേടും. മകനെ സിനിമയില്‍ എത്തിക്കണം എന്നാണ് ജയം രവി ഒരു ദേശീയ മാധ്യമത്തിന് നല്‍കിയ അഭിമുഖത്തില്‍ പറഞ്ഞത്.
