ജയം രവിയെ പ്രധാന കഥാപാത്രമാക്കി മണിരത്നം അണിയിച്ചൊരുക്കുന്ന ചിത്രം പൊന്നിയിൻ സെൽവന്റെ ലോക്കേഷൻ ചിത്രവുമായി മലയാളികളുടെ പ്രിയതാരം ജയറാം. സിനിമയുടെ ലോക്കേഷനിൽ ഇരിക്കുന്ന ജയറാമിന്റെയും സഹപ്രവർത്തരുടെയും ചിത്രമാണ് സോഷ്യൽ മീഡിയായിൽ വെെറലായി മാറിട്ടുള്ളത്. ബ്രഹ്മാണ്ഡ ചിത്രമായ പൊന്നിയിൻ സെൽവൻ ഒന്നാം ഭാഗത്തിന്റെ ടീസർ പുറത്തു വന്നതിനു പിന്നാലെ, ടീസറിൽ സെക്കന്റുകൾ മാത്രം മിന്നിമാഞ്ഞ ജയറാമിന്റെ കഥാപാത്രവും സൈബർ ഇടങ്ങളിൽ ചർച്ചയായി മാറിയിരുന്നു.
പിന്നാലെയാണ് ജയറാം ലോക്കേഷൻ ചിത്രം പങ്കുവെച്ചത്.‘രവിവര്‍മ്മൻ…മണിരത്നം വാക്കുകൾക്ക് അതീതമായ പ്രതിഭകൾ. ചരിത്രത്തിന്റെ ഭാഗമാകാൻ പോകുന്ന പൊന്നിയിൻ സെൽവൻ.. ഒരുപാട് ആഗ്രഹിച്ച വേഷം.. ആൾവാർക്ക് അടിയൻ നമ്പി’ എന്ന അടിക്കുറിപ്പോടെയാണ് ജയറാം പങ്കുവെച്ചിട്ടുള്ളത്. അതിഗംഭീര സെറ്റും കണ്ണഞ്ചിപ്പിക്കുന്ന യുദ്ധരംഗങ്ങൾകൊണ്ടും സമ്പുഷ്ടമാണ് ടീസർ.
വിക്രം, ജയം രവി, കാർത്തി, ഐശ്വര്യ റായി, തൃഷ, ഐശ്വര്യ ലക്ഷ്മി, ശോഭിത ധുലിപാല, പ്രഭു, അശ്വിൻ കകുമനു, ലാൽ, പാർഥിപൻ, റിയാസ് ഖാൻ, മോഹൻ രാമൻ, അമല പോൾ, കീർത്തി സുരേഷ്, റാഷി ഖന്ന, സത്യരാജ്, ശരത്കുമാർ, ജയറാം, റഹ്മാൻ, കിഷോർ, പ്രകാശ് രാജ്, വിക്രം പ്രഭു, ജയചിത്ര തുടങ്ങിയവർ ചിത്രത്തിൽ പ്രധാന വേഷങ്ങളിലെത്തുന്നുണ്ട്.
അഞ്ചു ഭാഗങ്ങൾ ഉള്ള ബ്രഹ്മാണ്ഡ നോവൽ ആണ് പൊന്നിയിൻ സെൽവൻ. അതു ചുരുക്കി, രണ്ടു ഭാഗങ്ങളുള്ള സിനിമയാക്കുകയാണ് മണിരത്നത്തിന്റെ ലക്ഷ്യം. ചിത്രം സെപ്റ്റംബർ 30ന് റിലീസ് ചെയ്യും.