ബോള്‍ഡായ കഥാപാത്രങ്ങള്‍ക്ക് പുതിയ മാനം നല്‍കിയ അഭിനേത്രിയാണ് ഷീലു എബ്രഹാം. പുതിയ നിയമത്തിലെ ജീനഭായ് ഐപിഎസ് പോലുള്ള കരുത്തുറ്റ വേഷങ്ങളിലൂടെ പ്രേക്ഷകപ്രീതി നേടിയതാരം. ദിലീപ് ചിത്രം ശുഭരാത്രിയില്‍ കരുത്തുറ്റ കഥാപാത്രമായെത്തി പ്രേക്ഷകരുടെ കൈയടി നേടിയ ഷീലുവിന്റെ പുതിയ ചിത്രം ജയറാം നായകനായെത്തുന്ന പട്ടാഭിരാമനാണ്.
ആടുപുലിയാട്ടത്തിന് ശേഷം ജയറാമും ഷീലുവും വീണ്ടും ഒന്നിക്കുന്ന ചിത്രം കൂടിയാകും പട്ടാഭിരാമന്‍. ജയറാമിനെ നായകനാക്കി കണ്ണന്‍ താമരക്കുളം ഒരുക്കുന്ന നാലാമത് ചിത്രമാണിത്. തിങ്കള്‍ മുതല്‍ വെള്ളി വരെ (2015), ആടുപുലിയാട്ടം (2016), അച്ചായന്‍സ് (2017) എന്നീ ചിത്രങ്ങളാണ് ജയറാം കണ്ണന്‍ താമരക്കുളം കൂട്ടുകെട്ടില്‍ ഇതിനു മുമ്പ് പിറന്നത്. ഈ കൂട്ടുകെട്ടില്‍ നാലാമതൊരു ചിത്രം റിലീസിന് ഒരുങ്ങുമ്പോള്‍ ഏരെ പ്രതീക്ഷയാണ് ആരാധകര്‍ക്കുള്ളത്.
ഒരു പ്രത്യേക സാഹചര്യത്തില്‍ പട്ടാഭിരാമന്‍ എന്ന കഥാപാത്രത്തിന്റെ ജീവിതത്തില്‍ ഉണ്ടാകുന്ന ചില സവിശേഷ സംഭവങ്ങളാണ് ചിത്രത്തില്‍ അവതരിപ്പിക്കുന്നത്. ആക്ഷനും കോമഡിയ്ക്കും ഒരുപോലെ പ്രാധാന്യമുള്ള ചിത്രമാണിത്. മിയാ ജോര്‍ജും ഷീലു എബ്രഹാമുമാണ് ചിത്രത്തില്‍ നായികമാരായി എത്തുന്നത്. ബൈജു സന്തോഷ് സുധീര്‍ കരമന, ധര്‍മ്മജന്‍ ബൊള്‍ഗാട്ടി, ഹരീഷ് കണാരന്‍, സായ്കുമാര്‍, ജനാര്‍ദ്ദനന്‍, ദേവന്‍, ബിജു പപ്പന്‍, വിജയകുമാര്‍, പ്രേംകുമാര്‍, തെസ്‌നി ഖാന്‍, ബാലാജി, മായാ വിശ്വനാഥ്, പ്രിയാ മേനോന്‍ എന്നിവരാണ് മറ്റ് പ്രധാന താരങ്ങള്‍.
അബാം മൂവീസിന്റെ ബാനറില്‍ ഏബ്രഹാം മാത്യുവാണ് നിര്‍മ്മാണം. കണ്ണന്‍ താമരക്കുളം സംവിധാനം ചെയ്യുന്ന ചിത്രത്തിന്റെ തിരക്കഥ ദിനേശ് പള്ളത്തിന്റേതാണ്. കൈതപ്രം, മുരുകന്‍ കാട്ടാക്കട എന്നിവരുടെ വരികള്‍ക്ക് ഈണം പകരുന്നത് എം.ജയചന്ദ്രനാണ്. ഛായാഗ്രഹണം നിര്‍വ്വഹിച്ചിരിക്കുന്നത് രവിചന്ദ്രനാണ്. ചിത്രം ഈ മാസം 23 ന് തിയേറ്ററുകളിലെത്തും.