മമ്മൂട്ടിയും ജ്യോതികയും നായികാനായകന്മാരായി എത്തുന്ന ‘കാതല്‍ ദി കോറിനെക്കുറിച്ച് മനസ്സുതുറന്ന് സംവിധായകന്‍ ജിയോ ബേബി. കഥ കേട്ടയുടന്‍ പ്രധാന കഥാപാത്രമാകാന്‍ മമ്മൂട്ടിയാണ് ഏറ്റവും യോജിച്ചതെന്ന് തോന്നി. നായികയായി ജ്യോതികയെ നിര്‍ദേശിച്ചത് മമ്മൂട്ടിയാണെന്നും അദ്ദേഹം പറഞ്ഞു. കൊച്ചി ടൈംസിന് നല്‍കിയ അഭിമുഖത്തില്‍ സംസാരിക്കുകയായിരുന്നു സംവിധായകന്‍.
‘ തിരക്കഥ കേട്ടയുടന്‍ കഥാപാത്രത്തിന് മമ്മൂട്ടി അനുയോജ്യനായിരിക്കുമെന്ന് എനിക്കുറപ്പായിരുന്നു. അദ്ദേഹത്തോട് കഥ പറഞ്ഞപ്പോള്‍ ഇഷ്ടപ്പെട്ടു. മമ്മൂട്ടി കഥാപാത്രത്തിന്റെ പങ്കാളിയാകാന്‍ പല നടിമാരേയും പരിഗണിക്കുമ്പോള്‍ അദ്ദേഹം തന്നെയാണ് ജ്യോതികയെ നിര്‍ദേശിക്കുന്നത്. ജ്യോതികയ്ക്കും കഥ ഇഷ്ടപ്പെട്ടു.
എന്റെ ഓരോ സിനിമയും മുന്‍ സിനിമകളില്‍ നിന്ന് വ്യത്യസ്തമായിരിക്കണം, ഇതും വ്യത്യസ്തമാണ്. ഒരുപാട് പേര്‍ എന്നെ തിരക്കഥകളുമായി സമീപിക്കാറുണ്ട്. അതിലെല്ലാം എനിക്കേറ്റവും താത്പര്യം തോന്നിയതും ചെയ്യണമെന്ന് ആഗ്രഹിച്ചതും ഈ കഥയാണ്,’ ജിയോ ബേബി പറഞ്ഞു.
ചിത്രത്തിന്റെ ഫസ്റ്റ് ലുക്ക് പുറത്ത് വന്നതോടെ പ്രതീക്ഷയില്‍ ആണ് ആരാധകര്‍. ആദര്‍ശ് സുകുമാരന്‍, പോള്‍സണ്‍ സ്‌കറിയ എന്നിവര്‍ ചേര്‍ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. ഇരുവരുടേയും ആദ്യ ചിത്രം ‘നെയ്മര്‍’ റിലീസിന് ഒരുങ്ങുകയാണ്. സലു കെ തോമസ് ആണ് ഛായാഗ്രഹണം. ഫ്രാന്‍സിസ് ലൂയിസ് എഡിറ്റിംഗ് നിര്‍വഹിക്കുന്നു. ഈ ആഴ്ച അവസാനം എറണാകുളത്ത് ആദ്യ ഷെഡ്യൂള്‍ ഷൂട്ടിംഗ് ആരംഭിക്കുന്ന കാതല്‍ ദി കോറില്‍ ലാലു അലക്‌സ്, മുത്തുമണി, ചിന്നു ചാന്ദ്‌നി എന്നിവരും കഥാപാത്രങ്ങളാണ്.