മോഹന്‍ലാലും ലാല്‍ജോസും ഒന്നിച്ച വെളിപാടിന്റെ പുസ്തകത്തിലെ എന്റമ്മേടെ ജിമിക്കി കമ്മല്‍ എന്ന ഗാനം അന്താരാഷ്ട്ര നേട്ടത്തില്‍. പാട്ട് പുറത്തിറങ്ങി മൂന്നു മാസത്തിനകം അഞ്ചു കോടി കാഴ്ച്ചക്കാരാണ് യൂട്യൂബില്‍ പാട്ടിനെ തേടിയെത്തിയത്.
ബോക്സ്ഓഫിസില്‍ വന്‍ വിജയമായിരുന്നില്ലെങ്കിലും ജിമിക്കി കമ്മല്‍ എന്ന ഗാനത്തിന് വന്‍ സ്വീകാര്യതയാണ് ലഭിച്ചത്. പല വേര്‍ഷനുകളില്‍ പലരും പുതുക്കിപ്പണിത് നൃത്തം വെച്ച ജിമിക്കികമ്മലിന്റെ ഒറിജിനല്‍ വേര്‍ഷന്‍ യൂട്യൂബില്‍ 5 കോടിക്കു മുകളില്‍ കാഴ്ചക്കാരെ സ്വന്തമാക്കി ഇപ്പോഴും പ്രിയപ്പെട്ട ട്രാക്കായി തുടരുകയാണ്.
ഒറിജിനലിനേക്കാള്‍ പ്രചാരം നേടിയ ഒട്ടേറേ വീഡിയോകള്‍ ജിമിക്കി കമ്മലിനുണ്ടായിരുന്നു എന്നതോര്‍ത്താല്‍ ഷാന്‍ റഹ്മാന്‍ ഈണമിട്ട് വിനീത് ശ്രീനിവാസനും രഞ്ജിത് ഉണ്ണിയും ചേര്‍ന്ന് പാടിയ പാട്ടിന്റെ വ്യാപ്തി എത്രത്തോളമായെന്നു വ്യക്തമാകും. അനില്‍ പനച്ചൂരാനാണ് വരികളെഴുതിയത്.