ജിമിക്കി കമ്മലിന്റെ അലയടികള്‍ അവസാനിക്കുന്നില്ല. 2017 ല്‍ യൂട്യൂബില്‍ ഇന്ത്യയില്‍ നിന്നും ഏറ്റവും അധികം ആളുകള്‍ കണ്ട വീഡിയോകളില്‍ ഇന്ത്യന്‍ സ്‌കൂള്‍ ഓഫ് കൊമേഴ്സിലെ അധ്യാപികമാരുടെ നേതൃത്വത്തില്‍ നടന്ന വീഡിയോ രണ്ടാം സ്ഥാനത്ത്. ലാല്‍ ജോസ് സംവിധാനം ചെയ്ത വെളിപാടിന്റെ പുസ്തകകത്തിലെ ജിമിക്കി കമ്മല്‍ സോങ് ഇറങ്ങിയ ഉടനെ നിരവധി വീഡിയോയാണ് ഇതിനെ ചുറ്റിപറ്റി ഇറങ്ങിയത്. ഓണാഘോഷത്തോടനുബന്ധിച്ച് മെറിന്റെ നേതൃത്വത്തില്‍ ഇറങ്ങിയ ജിമിക്കി കമ്മല്‍ വേര്‍ഷന്‍ ഒര്‍ജിനലിനെക്കാളും ശ്രദ്ധ പിടിച്ചു പറ്റിയിരുന്നു. സംഭവം കിടുക്കിയതോടെ അധ്യാപികമാരായ ഷെറിലും അന്നയും താരങ്ങളാവുകയും ചെയ്തു.
യൂട്യൂബ് റിവൈന്‍ഡ് ഇന്ത്യയിലാണ് പോയ വര്‍ഷം യൂട്യൂബിലെ ടോപ്പ് ട്രെന്‍ഡിങ് വീഡിയോകളില്‍ ഇന്ത്യന്‍ സ്‌കൂള്‍ ഓഫ് കൊമേഴ്സിലെ അധ്യാപികമാരുടെ നേതൃത്വത്തില്‍ നടന്ന ജിമിക്കി കമ്മല്‍ ഡാന്‍സ് വീഡിയോയും ഇടംപിടിച്ചത്. തമിഴ്നാട്ടില്‍ നിന്നാണ് ഷെറിലിന്റേയും സംഘത്തിന്റെയും ഡാന്‍സ് വീഡിയോയ്ക്ക് ആരാധകര്‍ ഏറെയുണ്ടായത്. അതിനെ തുടര്‍ന്ന് സൂര്യയുടെ താനാ സേര്‍ന്ത കൂട്ടം എന്ന ചിത്രത്തിലെ സെടക്കു മേലെ എന്നു തുടങ്ങുന്ന ഗാന രംഗത്തില്‍ ഷെറിലിനേയും അന്നയെയും ഉള്‍പ്പെടുത്തിയിരുന്നു.
ഒരു മലയാള ഗാനം രാജ്യത്തുടനീളം വൈറലാവുന്നത് ഇതാദ്യമായാണ്. ഹിന്ദിയിലും മറ്റ് ഭാഷകളിലും ജിമിക്കി കമ്മലിന് റീമേക്കുകളുണ്ടായി. ഇന്ത്യക്ക് പുറത്തും ഈ പാട്ടിന് ആരാധകര്‍ ഉണ്ടായി. അടുത്തിടെ ബോളിവുഡ് താരം അഭിഷേക് ബച്ചനും ജിമിക്കി കമ്മലിനെ പ്രശംസിച്ച് രംഗത്തു വന്നിരുന്നു. ബിബി കി വൈന്‍സിന്റെ ഗ്രൂപ്പ് സ്റ്റഡി ആണ് ഏറ്റവും അധികം ആളുകള്‍ കണ്ട വീഡിയോകളില്‍ ഒന്നാമത്.