ജോഷിയുടെ പൊറിഞ്ചു മറിയം ജോസ് തിയേറ്ററുകളില്‍ മികച്ച പ്രതികരണം നേടി മുന്നേറി കൊണ്ടിരിക്കുകയാണ്. കാട്ടാളന്‍ പൊറിഞ്ചു ആയി വേഷമിട്ട ജോജു ജോര്‍ജ്ജിന് പ്രശംസാ പ്രവാഹമാണ്. അത്രയും ഗംഭീരമായി തന്നെ ആ കഥാപാത്രത്തെ ജോജു അവതരിപ്പിച്ചിട്ടുണ്ട്. ഇപ്പോഴിതാ കഥാപാത്രമായി മാറാന്‍ തന്നെ സഹായിച്ച ഘടകങ്ങളെ കുറിച്ച് ഒരു അഭിമുഖത്തില്‍ തുറന്നു പറഞ്ഞിരിക്കുകയാണ് ജോജു.
ഇത്ര പരുക്കനും അതേ സമയം സ്‌നേഹം ഉള്ളില്‍ സൂക്ഷിക്കുന്നവനുമായ പൊറിഞ്ചുവിന് ഏതു തരം ശരീര ഭാഷയാണ് കൊടുക്കേണ്ടത് എന്നതായിരുന്നു ജോജുവിന്റെ സംശയം. അത് ജോജു സുഹൃത്തായ ശ്യാം പുഷ്‌കരനോട് പറഞ്ഞപ്പോള്‍ ശ്യാം ജോജുവിനോട് രണ്ടു ചിത്രങ്ങള്‍ കാണാന്‍ പറഞ്ഞു.
അത് രണ്ടും മമ്മൂട്ടി അഭിനയിച്ച രണ്ടു പഴയ ചിത്രങ്ങള്‍ ആയിരുന്നു. അടിയൊഴുക്കുകളും മഹായാനവുമാണ് ശ്യാം പുഷ്‌ക്കരന്‍ നിര്‍ദേശിച്ച ആ രണ്ടു മമ്മൂട്ടി ചിത്രങ്ങള്‍. മലയാള സിനിമയില്‍ ഏറ്റവും കൂടുതല്‍ പരുക്കന്‍ കഥാപാത്രങ്ങള്‍ അഭിനയിച്ച നടന്മാരില്‍ ഒരാള്‍ ആണ് മമ്മൂട്ടി. അദ്ദേഹത്തിന്റെ അഭിനയ ജീവിതത്തിലെ അത്തരത്തിലുള്ള മികച്ച രണ്ടു കഥാപാത്രങ്ങള്‍ മുകളില്‍ പറഞ്ഞ സിനിമകളിലേതു ആണ്. അതുകൊണ്ടാണ് അത്തരം ഒരു വേഷം ചെയ്യാന്‍ ആ ചിത്രങ്ങളിലെ അദ്ദേഹത്തിന്റെ പ്രകടനം കാണാന്‍ ശ്യാം പുഷ്‌ക്കരന്‍ നിര്‍ദേശിച്ചത്. ആ ചിത്രങ്ങള്‍ കണ്ടതോടെ തന്റെ ടെന്‍ഷന്‍ മാറി എന്നും ജോജു പറയുന്നു.