ജൂനിയര്‍ എന്‍ടിആറിനെ നായകനാക്കി കൊരട്ടാല ശിവ സംവിധാനം ചെയ്ത ‘ദേവര പാര്‍ട്ട് 1’ ഇനി ഒ.ടി.ടിയിലേക്ക്. തിയേറ്ററുകളില്‍ പ്രദര്‍ശനം കുറഞ്ഞതോടെയാണ് ചിത്രത്തിന്റെ ഒ.ടി.ടി റിലീസ് തീയതി പുറത്തു വന്നിരിക്കുന്നത്. സെപ്റ്റംബര്‍ 27ന് തിയേറ്ററുകളില്‍ എത്തിയ ചിത്രം നവംബറില്‍ ഒടി.ടിയില്‍ എത്തും.
നവംബര്‍ 8ന് നെറ്റ്ഫ്‌ളിക്‌സില്‍ സ്ട്രീമിംഗ് ആരംഭിക്കും. അതേസമയം, 300 കോടി ബജറ്റില്‍ ഒരുക്കിയ ദേവര 500 കോടിയോളം കളക്ഷശന്‍ ആണ് ഇതുവരെ ബോക്‌സ് ഓഫീസില്‍ നിന്നും നേടിയത്. ജൂനിയര്‍ എന്‍ടിആര്‍ ഇരട്ട വേഷത്തിലെത്തിയ ചിത്രത്തില്‍ നായികയായി എത്തിയത് ബോളിവുഡ് നടി ജാന്‍വി കപൂറാണ്.
ജാന്‍വിയുടെ ആദ്യ തെലുങ്ക് ചിത്രമെന്ന പ്രത്യേകതയും ദേവരയ്ക്കുണ്ട്. സെയ്ഫ് അലിഖാന്‍ വില്ലന്‍ വേഷത്തിലെത്തിയ ചിത്രം തെലുങ്ക്, ഹിന്ദി, തമിഴ്, മലയാളം, കന്നഡ എന്നീ അഞ്ച് ഭാഷകളിലും മികച്ച ഓപ്പണിംഗോടെയാണ് തന്റെ ബോക്‌സ് ഓഫീസില്‍ കുതിച്ചത്.
കൊരട്ടാല ശിവ തിരക്കഥയെഴുതി സംവിധാനം ചെയ്ത ചിത്രം നിര്‍മ്മിച്ചത് യുവസുധ ആര്‍ട്ട്‌സും എന്‍ടിആര്‍ ആര്‍ട്ട്‌സും ചേര്‍ന്നാണ്. രണ്ട് ഭാഗങ്ങളായി ഒരുങ്ങുന്ന ചിത്രത്തിന്റെ ആദ്യ ഭാഗമാണ് പുറത്തിറങ്ങിയത്. ദേവര 2 എന്ന് പുറത്തിറങ്ങും എന്നതില്‍ വ്യക്തതയില്ല.
ചിത്രത്തില്‍ പ്രകാശ് രാജ്, ഷൈന്‍ ടോം ചാക്കോ, നരേന്‍, കലൈയരസന്‍, അജയ്, അഭിമന്യു സിംഗ് എന്നിവരും മുഖ്യ വേഷങ്ങളിലെത്തി. ഛായാഗ്രഹണം നിര്‍വഹിച്ചിരിക്കുന്നത് രത്‌നവേലുവാണ്. സാബു സിറിലാണ് പ്രൊഡക്ഷന്‍ ഡിസൈനര്‍. വലിയ ബജറ്റില്‍ ഇറങ്ങിയ ചിത്രത്തിന്റെ സംഗീതം ഒരുക്കിയത് അനിരുദ്ധ് രവിചന്ദര്‍ ആണ്.