നടന് കൈലാഷിനെതിരെ സോഷ്യല്‍ മീഡിയയില്‍ നടക്കുന്ന ആക്രമണത്തില്‍ നടന് പിന്തുണ അറിയിച്ച് സിനിമാലോകം. സംവിധായകന്‍ അരുണ്‍ ഗോപി, നടന് അപ്പാനി ശരത്ത് തുടങ്ങിയവര്‍ തങ്ങളുടെ ഫെയ്സ്ബുക്ക് പേജിലൂടെ കൈലാഷിന് നേരിടുന്ന ആക്രമണത്തിനെതിരെ പ്രതികരിച്ചിട്ടുണ്ട്.
“പ്രിയപ്പെട്ട കൈലാഷിന്റെ പുതിയ ചിത്രത്തിന്റെ പോസ്റ്റര്‍ സന്തോഷത്തോടെ അഭിമാനത്തോടെ പങ്കുവെയ്ക്കുന്നു. പലര്‍ക്കും ഇതൊക്കെ നേരമ്പോക്കുകള്‍ ആകും അടച്ചിട്ട മുറിയിലിരുന്നു മറ്റൊരാളെ മുറിപ്പെടുത്താന്‍ പാകത്തില്‍ വാക്കുകള്‍ വെറുതെ സോഷ്യല്‍ മീഡിയയിലെഴുതി വിട്ടാല്‍ ഒരു ദിവസം ആ ചീഞ്ഞ മനോരോഗ മനസ്സിന് ആശ്വാസം കിട്ടുമായിരിക്കും. അതിനപ്പുറമാണ് സിനിമ എന്നത് പലര്‍ക്കും. മനസ്സിലാക്കേണ്ട, ഉപദ്രവിക്കാതിരിക്കാനുള്ള മാന്യത കാട്ടണം. അപേക്ഷയാണ്”, അരുണ്‍ ഗോപി ഫെയ്സ്ബുക്കില്‍ കുറിച്ചു.
കഴിഞ്ഞ ദിവസം മിഷന്‍ സി എന്ന ചിത്രത്തിന്റെ പുതിയ പോസ്റ്റര്‍ റിലീസ് ചെയ്തിരുന്നു. കൈലാഷിന്റെ ഫസ്റ്റ് ലുക്ക് പോസ്റ്റര്‍ ആയിരുന്നു റിലീസ് ചെയ്തത്. ഇതോടെയായിരുന്നു അദ്ദേഹത്തിന് നേരെ ട്രോള് രൂപേണയുള്ള ആക്രമണം തുടങ്ങിയത്. ഇതിനെതിരെ സംവിധായകന്‍ വിനോദ് ഗുരുവായൂര്‍ രംഗത്തെത്തിയിരുന്നു.
“മിഷന്‍ സി എന്ന സിനിമയുടെ കമന്റുകളില്‍ കുറച്ചു പേരെങ്കിലും വളരെ മോശമായാണ് കമന്റുകള്‍ ഇട്ടിരിക്കുന്നത്. കൈലാഷ് എന്ന നടനെ അദ്ദേഹത്തിന്റെ തുടക്കക്കാലം മുതല്‍ എനിക്കറിയാം.. ഇത്രയധികം കളിയാക്കലുകള്‍ അനുഭവിച്ച ഒരു നടന് അടുത്ത കാലത്തൊന്നും ഉണ്ടായിട്ടില്ല.. പക്ഷെ അയാള്‍ ചെയ്യുന്ന നല്ല ചിത്രങ്ങള്‍ നമ്മള്‍ അംഗീകരിക്കണം. ഇന്നും ഒരുപാട് ചിത്രങ്ങളുടെ ഭാഗമാണ് കൈലാഷ്. സിനിമാക്കകത്തു ഏതൊരാവശ്യം പറഞ്ഞാലും സാമ്പത്തിക ലാഭം പോലും നോക്കാതെ ഏതൊരു പുതിയ സംവിധായകനും നേരിട്ട് സമീപിക്കാവുന്ന ചുരുക്കം ചിലരില്‍ ഒരാളാണ് കൈലാഷ്. ദയവു ചെയ്ത് ഒരു സംരഭം, അത് കണ്ടിട്ടെങ്കിലും അഭിപ്രായം പറയാന്‍ ശ്രമിക്കുക”, വിനോദ് ഗുരുവായൂര്‍ പറഞ്ഞു.