മരക്കാര്‍ അറബിക്കടലിന്റെ സിംഹം സിനിമയ്ക്കായി കാത്തിരിക്കുകയാണ് ആരാധകര്‍. സംസ്ഥാന ചലച്ചിത്ര പുരസ്‌കാര പട്ടികയിലും സിനിമ ഇടംപിടിച്ചതോടെ ചിത്രത്തിനായുള്ള പ്രതീക്ഷയും വര്‍ദ്ധിപ്പിച്ചിരിക്കുകയാണ്. മികച്ച ഡബ്ബിംഗ്, വിഎഫ്എസ്, നൃത്തസംവിധാനം എന്നീ പുരസ്‌കാരങ്ങളാണ് ചിത്രത്തിന് ലഭിച്ചിരിക്കുന്നത്.
സിനിമയിലെ നൃത്തരംഗങ്ങള്‍ ഒരുക്കിയ ബൃന്ദ മാസ്റ്ററെയും പ്രസന്ന മാസ്റ്ററെയും അഭിനന്ദിച്ചിരിക്കുകയാണ് ചിത്രത്തില്‍ ഒരു പ്രധാന വേഷം അവതരിപ്പിച്ച നടി കല്യാണി പ്രിയദര്ശന്. കല്യാണിയും പ്രണവും അഭിനയിച്ച ഗാനരംഗത്തിന്റെ സ്റ്റില്‍ പുറത്തു വിട്ടാണ് കല്യാണി ഇവര്‍ക്ക് അഭിനന്ദനങ്ങള്‍ അറിയിച്ചിരിക്കുന്നത്.
“”സിനിമയുടെ വാണിജ്യ റിലീസിന് മുന്നേ നിങ്ങള്‍ക്ക് ഇതിനകം ഹൃദയങ്ങളും പുരസ്‌കാരങ്ങളും നേടാന്‍ കഴിഞ്ഞു ബൃന്ദ മാസ്റ്റര്‍. ഈ മനോഹരമായ ഗാനവും ആ ദൃശ്യങ്ങളുടെ ആത്മാവും നല്‍കിയതിന് എന്റെ എല്ലാ സ്‌നേഹവും നന്ദിയും. ആളുകള്‍ ഇത് കാണുന്നത് വരെ കാത്തിരിക്കാനാവില്ല. നിങ്ങളോടൊപ്പം പ്രവര്‍ത്തിക്കാന്‍ കഴിഞ്ഞത് എല്ലായ്‌പ്പോഴും ഒരു ബഹുമതിയാണ്. നിങ്ങളുടെ നാലാമത്തെ കേരള സംസ്ഥാന അവാര്‍ഡിന് അഭിനന്ദനങ്ങള്‍”” എന്നാണ് കല്യാണിയുടെ വാക്കുകള്‍.
https://www.instagram.com/p/CGUtUmnMN9P/?utm_source=ig_embed
മികച്ച ഡബ്ബിംഗ് ആര്‍ട്ടിസ്റ്റിനുള്ള പുരസ്കാരം നടന്‍ വിനീതിനാണ് ലഭിച്ചത്. ചിത്രത്തില്‍ തമിഴ് നടന്‍ അര്‍ജുന് വേണ്ടി അനന്തന്‍ എന്ന കഥാപാത്രത്തിനാണ് വിനീത് ശബ്ദം നല്‍കിയത്. മൂന്നാമത്തെ അവാര്‍ഡ് ചിത്രത്തിലെ വിഎഫ്എക്സ് ജോലികള്‍ക്കാണ് ലഭിച്ചത്. ചിത്രത്തിന്റെ വിഎഫ്എക്സ് സൂപ്പര്‍വൈസര്‍ ആയ സിദ്ധാര്‍ഥ് പ്രിയദര്ശന് ആണ് പുരസ്കാരം. മരക്കാറിന്റെ സെന്‍സറിംഗ് നേരത്തെ പൂര്‍ത്തിയായതിനാലാണ് ഈ വര്‍ഷത്തെ അവാര്‍ഡ് പ്രഖ്യാപനത്തില്‍ പരിഗണിച്ചത്.