ഇന്ത്യന്‍ സിനിമാലോകം ഏറെ ആവേശത്തോടെ കാത്തിരുന്ന ബിഗ് ബജറ്റ് ചിത്രം ‘ഇന്ത്യന്‍ 2’വിന്റെ ട്രെയ്‌ലര്‍ എത്തിയിരിക്കുകയാണ്. എന്നാല്‍ വിസ്മയമാകും എന്ന് കരുതിയ ട്രെയ്‌ലറിന് വിമര്‍ശനങ്ങളും ട്രോളുകളുമാണ് ലഭിച്ചു കൊണ്ടിരിക്കുന്നത്. ഇന്നലെ റിലീസ് ചെയ്ത ട്രെയ്‌ലര്‍ 5 മില്യണ്‍ വ്യൂസ് നേടിയിരുന്നു.
എന്നാല്‍ കമല്‍ ഹാസന്റെ ലുക്ക് അടക്കം സോഷ്യല്‍ മീഡിയയില്‍ ട്രോള്‍ ചെയ്യപ്പെടുകയാണ്. മുടി നീട്ടി വളര്‍ത്തിയ ലുക്കിലുള്ള സേനാപതിയെ ശ്രീനിവാസന്റെ ലുക്കിനോടാണ് ട്രോളന്‍മാര്‍ താരതമ്യം ചെയ്തിരിക്കുന്നത്. ട്രെയ്‌ലറില്‍ കാണിച്ച മറ്റൊരു ലുക്ക് സാമൂഹിക പ്രവര്‍ത്തകന്‍ മൈത്രേയന്റെ ലുക്കിനോട് താരതമ്യം ചെയ്താണ് ട്രോളന്‍മാര്‍ ആഘോഷമാക്കുന്നത്.
‘ഇത് എന്ത് അവരാതമാണ് ശങ്കര്‍ പടച്ചുവിട്ടത്’ പലരും ചോദിക്കുന്നുണ്ട്. ‘ഇന്ത്യന്‍ മുന്നോട്ടു വെച്ച പൊളിറ്റിക്കല്‍ ഫോര്‍മുല നിറഞ്ഞ കഥയെ മാസ്സ് മസാല ആക്ഷന്‍ എന്റര്‍ടൈയനര്‍ സെക്ടറിലേക്ക് മാറ്റിവെച്ചതാണെന്നു തോന്നുന്നു’ എന്നാണ് മറ്റൊരു കമന്റ്. അതേസമയം, ജൂലൈ 12ന് ആണ് ചിത്രം റിലീസ് ചെയ്യുന്നത്.
എസ്‌ജെ സൂര്യ, കാജല്‍ അഗര്‍വാള്‍, രാകുല്‍ പ്രീത് സിംഗ്, ബോബി സിംഹ എന്നിവര്‍ക്കൊപ്പം നെടുമുടി വേണുവും വിവേകും ചിത്രത്തിലുണ്ട്. ഇരു താരങ്ങളുടെയും മരണശേഷം പുറത്തിറങ്ങുന്ന ചിത്രം എന്ന രീതിയില്‍ ഇന്ത്യന്‍ 2 വലിയ വാര്‍ത്താപ്രാധാന്യം നേടിയിരുന്നു. ഇരുവരും ഉള്‍പ്പെടുന്ന രംഗങ്ങളും ട്രെയിലറിലുണ്ട്.
‘ഇന്ത്യന്‍ 2’വിന്റെ തിരക്കഥ ബി ജയമോഹന്‍, കബിലന്‍ വൈരമുത്തു, ലക്ഷ്മി ശരവണ കുമാര്‍ തുടങ്ങിയ എഴുത്തുകാരുമായ് ചേര്‍ന്നാണ് സംവിധായകന്‍ ശങ്കര്‍ തയ്യാറാക്കിയത്. കഥ സംവിധായകന്റേത് തന്നെയാണ്. 1996ലെ ബോക്സ് ഓഫീസ് റെക്കോര്‍ഡുകള്‍ തകര്‍ത്ത് ബ്ലോക്ക്ബസ്റ്ററടിച്ച ‘ഇന്ത്യന്‍’ എന്ന ചിത്രത്തിന്റെ തുടര്‍ച്ചയാണ് ഇന്ത്യന്‍ 2.
1996 മെയ് 9ന് ആണ് ഇന്ത്യന്‍ റിലീസ് ചെയ്തത്. അഴിമതിക്കെതിരെ പോരാടുന്ന സ്വാതന്ത്രസമര സേനാനിയായ സേനാപതിയെന്ന വൃദ്ധന്റെ റോളിലാണ് കമല്‍ഹാസന്‍ ഇന്ത്യനില്‍ പ്രത്യക്ഷപ്പെട്ടത്. ഛായാഗ്രഹണം: രവി വര്‍മ്മന്‍, ചിത്രസംയോജനം: ശ്രീകര്‍ പ്രസാദ്, ആക്ഷന്‍: അന്‍ബറിവ്, പീറ്റര്‍ ഹെയിന്‍, സ്റ്റണ്ട് സില്‍വ.
