രഞ്ജിത്ത് ശങ്കറിന്റെ സംവിധാനത്തില്‍ അജുവര്‍ഗ്ഗീസ് നായകനായെത്തുന്ന ത്രില്ലര്‍ ചിത്രം കമല നവംബറില്‍ പുറത്തിറങ്ങാനിരിക്കെ ചിത്രത്തിലെ നായികയെ അവതരിപ്പിക്കുകയാണ് അണിയറ പ്രവര്‍ത്തകര്‍. തമിഴിലും തെലുങ്കിലും ഹിന്ദിയിലും ശ്രദ്ധേയ സാന്നിദ്ധ്യമറിയിച്ചിട്ടുള്ള റൂഹാനി ശര്‍മ്മയാണ് ചിത്രത്തിലെ നായിക. ഫസ്റ്റ്‌ലുക്ക് പോസ്റ്ററിലൂടെയാണ് നായികയെ പ്രേക്ഷകര്‍ക്കു മുന്നില്‍ അവതരിപ്പിക്കുന്നത്.
തന്റെ ഇതു വരെയുള്ള തിരക്കഥകളിലെ ഏറ്റവും സങ്കീര്‍ണമായ കഥാപാത്രമാണ് റൂഹാനി ശര്‍മ അവതരിപ്പിക്കുന്ന കമല എന്ന എന്ന കഥാപാത്രമെന്ന് സംവിധായകന്‍ രഞ്ജിത്ത് ശങ്കര്‍ സാക്ഷ്യപ്പെടുത്തുന്നു. പ്രകടനം കൊണ്ട് തന്നെ അത്ഭുതപ്പെടുത്തിയ നായികയാണ് റൂഹാനി ശര്‍മ്മയെന്നും രഞ്ജിത്ത് ശങ്കര്‍ പറയുന്നു.
രഞ്ജിത് ശങ്കര്‍ തിരക്കഥയെഴുതിയിരിക്കുന്ന ചിത്രം ത്രില്ലര്‍ വിഭാഗത്തില്‍ പെടുന്നതാണ്. ചിത്രത്തിന്റെ ഫസ്റ്റ് ലുക്ക് പോസ്റ്ററും അതു സൂചിപ്പിക്കുന്നതായിരുന്നു. പുത്തന്‍ ഗെറ്റപ്പിലാണ് അജു ചിത്രത്തില്‍ പ്രത്യക്ഷപ്പെടുന്നത്. ഡ്രീംസ് ന്‍ ബിയോണ്ടാണ് ചിത്രം നിര്‍മിക്കുന്നത്.