കാര്‍ത്തി നായകനായെത്തിയ കൈതി 100 കോടി ക്ലബില്‍ ഇടംനേടി. റിലീസ് ചെയ്ത് 18-ാം ദിനം കൊണ്ടാണ് ചിത്രം 100 കോടി നേട്ടത്തിലെത്തിയത്. ഇതോടെ കാര്‍ത്തിയുടെ ആദ്യ 100 കോടി ചിത്രമായി കൈദി. വിജയ് ചിത്രം ബിഗിലിനൊപ്പം തിയേറ്ററുകളിലെത്തിയ കൈദി ഇതോടെ കാര്‍ത്തിയുടെ കരിയര്‍ ഹിറ്റ് ചിത്രമായി. കേരളത്തില്‍ ഉള്‍പ്പെടെ ഇപ്പോഴും ചിത്രം നിറഞ്ഞ സദസില്‍ പ്രദര്‍ശനം തുടരുകയാണ്.
കേരളത്തില്‍ സിനിമയുടെ ആദ്യ ആഴ്ചയിലെ ഗ്രോസ് 5.26 കോടിയായിരുന്നു. കാര്‍ത്തി സിനിമയ്ക്ക് കേരളത്തില്‍ നിന്നും ലഭിക്കുന്ന ഏറ്റവും ഉയര്‍ന്ന കളക്ഷന്‍ തുക കൂടിയാണിത്. മാനഗരം എന്ന ചിത്രത്തിനു ശേഷം ലോകേഷ് കനകരാജ് സംവിധാനം ചെയ്ത ത്രില്ലര്‍ ആണ് കൈതി. നായികയില്ല, ഗാനങ്ങളില്ല, പ്രണയരംഗങ്ങളില്ല എന്നതാണ് സിനിമയുടെ മറ്റൊരു പ്രത്യേകത.
രണ്ടര മണിക്കൂര്‍ ദൈര്‍ഘ്യമുള്ള ചിത്രത്തിന്റെ ഭൂരിഭാഗം കഥയും അരങ്ങേറുന്നത് രാത്രിയിലാണ്. തമിഴ്‌നാട്ടിലെ മയക്കുമരുന്ന്, ഗുണ്ടാ മാഫിയകളും പൊലീസും തമ്മിലുള്ള പോരാട്ടത്തിന്റെ കഥയാണ് ചിത്രം പറയുന്നത്.